Славаміра Адамовіча затрымалі за сіне-жоўтую стужку
24- 30.03.2014, 14:59
- 24,430
Вядомы паэт і былы палітвязень быў затрыманы на ўваходзе ў менскую станцыю метро «Магілёўская».
Фармальная прычына затрымання - высвятленне асобы, але сапраўдная, як распавёў «Радыё Свобода» Славамір Адамовіч, звязаная з падзеямі ў Украіне.
«Некалькі дзён выходжу ў горад з жоўта-блакітнай і бел-чырвона-белай стужкамі на вопратцы. Гэта мой знак салідарнасці з украінцамі ў іх барацьбе з акупантамі з Расеі. І вось затрымалі на ўваходзе ў метро. Цяпер разбіраюцца з маёй асобай. Праз тэлефон начальству кажуць, што «ў яго была жоўта-блакітная стужка, што з ім рабіць», - распавёў Славамір Адамовіч праз тэлефон з пастарунку на станцыі метро.
Паводле закону, міліцыя можа затрымаць грамадзяніна для высвятлення асобы на 3 гадзіны.
У сярэдзіне 1990-х гадоў Славамір Адамовіч быў асуджаны за верш «Забі прэзідэнта», адбыў у турме некалькі месяцаў. Пазней эміграваў з Беларусі, атрымаў палітычны прытулак у Нарвегіі. Некалькі гадоў таму ён вярнуўся ў Менск, дзе працягвае літаратурную і грамадскую дзейнасць.
Фота: zaukrainu.org