Кіраўніком справамі БПЦ прызначаны 33-гадовы архімандрыт Антоній
9- 4.03.2014, 17:20
- 15,127
З часу пасяджэння Сінода Беларускай Праваслаўнай Царквы прайшоў тыдзень, але інфармацыя аб ім пакуль не апублікаваная.
У навінавай жа інфармацыі аб асвячэнні храма ў Старобіне архімандрыта Антонія (Дароніна) называюць «Кіраўніком спраў Беларускай Праваслаўнай Царквы».
Выходзіць, што адно з рашэнняў Сінода такое: архіепіскап Навагрудскі і Лідскі Гурый (Апалько) больш не з'яўляецца Кіраўніком спраў Беларускага Экзархата, а гэта месца заняў пакуль не епіскап - архімандрыт Антоній (Даронін), піша «Наша Нiва».
Архімандрыт Антоній (Даронін), свецкае імя Дыянісій нарадзіўся 18 снежня 1980 года ў Баку.
У 2003 годзе скончыў Менскую духоўную семінарыю, тэма дыпломнай працы «Сістэматычны бібліяграфічны паказальнік артыкулаў Літоўскіх епархіяльных ведамасцяў з 1888 па 1902 гг.».
Зімовы семестр 2005/2006 года і летні семестр 2006 правёў у Вышэйшым праваслаўным багаслоўскім інстытуце Сусветнага Патрыярхату ў Шамбезі (Жэнева), аднак у спісе тых, хто абараніў магістарскую дысертацыю ў Інстытуце ён не значыцца.
У 2008 годзе абараніў кандыдацкую дысертацыю ў Менскай Духоўнай Акадэміі з тэмай «Беларускія трэбнікі XVII - XVIII стст.: Гісторыя і літургічнае багаслоўе».
З 2009-га па 2011 год навучаўся ў аспірантуры пры Аддзеле знешніх царкоўных сувязяў (АЗЦС), пасля заканчэння якой атрымаў пасведчанне аб павышэнні кваліфікацыі.
Пастрыжаны ў манаства з імем Антоній, пасвечаны ў дыяканскі сан і прызначаны асабістым сакратаром мітрапаліта Менскага і Слуцкага Філарэта не пазней 2009 года.
Пасвечаны ў герэйскі сан 6 красавіка 2010 г. Мітрапалітам Менскім і Слуцкім Філарэтам.
Узведзены ў сан ігумена 15 снежня 2010 года. Узведзены ў сан архімандрыта 7 студзеня 2012 года.
Прызначаны адказным сакратаром Упраўлення справамі Беларускай Праваслаўнай Царквы, памочнікам рэктара Менскіх Духоўных школ па Духоўна-адукацыйным цэнтры.