Financial Times: Расея не гатовая да новай «халоднай вайны»

Калі Савецкі Саюз уварваўся ў Чэхаславакію ў 1968 годзе, маскоўскі фондавы рынак не паваліўся - яго проста не было.

Навіны аб тым, што расейскія войскі фактычна ўзялі пад кантроль Крым, наадварот, былі сустрэтыя ў панядзелак падзеннем катыровак акцый на расейскім рынку на 10%, піша Financial Times (пераклад - Inopressa.ru).

Гэты кантраст з 1968 годам паказвае на тое, чаму ўсе размовы аб халоднай вайне неправамерныя. Эканамічны і палітычны кантэкст у Крыме ў 2014 годзе цалкам адрозніваецца ад Чэхаславакіі 1968 года. У Расеі больш няма імперыі, якая прасціраецца да Берліна. Боль гэтай тэрытарыяльнай страты збольшага тлумачыць, чаму прэзідэнт Уладзімір Пуцін гэтак адчайна б'ецца за захаванне Украіны ў сферы ўплыву Масквы.

Не менш важна і тое, што свет больш не падзелены паміж двума ўзаемавыключальнымі і варожымі палітычнымі і эканамічнымі сістэмамі - капіталістычнай заходняй і камуністычнай усходняй. Пасля краху савецкай сістэмы Расея далучылася да капіталістычнага светапарадку. Фінансавая, дзелавая і сацыяльная сістэмы Расеі і Захаду цяпер моцна ўзаемазвязаныя. Зараз, відавочна, вядзецца новая барацьба паміж Усходам і Захадам, але праводзіцца яна ў іншым ландшафце, чым халодная вайна, і па іншых правілах.

Зараз уяўляецца вельмі верагодным, што Расея мае намер трымацца за Крым, а таксама, магчыма, захапіць частку ўсходняй Украіны. Прэзідэнт Барак Абама і лідары ЕЗ паспяшаліся выключыць ваенную рэакцыю і правільна зрабілі. Але на Захадзе ёсць мноства эканамічных інструментаў, каб ускладніць жыццё Расеі.

«На працягу апошняга дзесяцігоддзя Пуцін і яго атачэнне часцяком выкарыстоўвалі рыторыку халоднай вайны, пры гэтым атрымліваючы асалоду ад пладоў глабалізацыі. Цяпер яны, магчыма, сутыкнуцца з выбарам. Яны могуць атрымаць новую халодную вайну. Ці атрымаць доступ да багаццяў Захаду. Альбо адно, альбо іншае», - заключае аўтар.