У Сімферопалі «дружыннікі» збілі жанчын, якія мітынгавалі

Удзельніц мірнай акцыі «Не вайне» збілі.

Дружыннікі, якія, па іх словах, забяспечваюць парадак у Крыме, напалі на ўдзельніц мірнай акцыі «Не вайне», якая праходзіла перад будынкам штаба войскаў берагавой абароны Украіны ў Сімферопалі, паведаміла інтэрнэт-выданне «15 хвілін» у сераду, 5 сакавіка.

Па словах карэспандэнта выдання, у вайсковай частцы раніцай 5 сакавіка сабраліся каля 80 дружыннікаў. Да гэтага месца таксама сталі падыходзіць мясцовыя жыхары, якія ўжо некалькі дзён праводзяць акцыю «Не вайне». Іх было каля 40 чалавек. Жанчыны падрыхтавалі плакаты з надпісамі на рускай мове «Не вайне!», «Мы хочам міру ў краіне».

Як толькі дзяўчаты паднялі свае плакаты, да іх падбеглі ўсе 80 дружыннікаў. Яны напалі на дзяўчат, спрабуючы адбіць у іх плакаты, а потым пачалі штурхаць і выцясняць іх з тэрыторыі перад будынкам штаба.

Абышлося без сур'ёзных наступстваў, мітынгоўцы абышліся гематомамі, камусьці парвалі бранзалеты.

Зараз дружыннікі засталіся перад кантрольна-прапускным пунктам, а дзяўчаты - наадварот, праз дарогу. Паміж імі сталі супрацоўнікі міліцыі.

Побач з гэтай часткай ужо некалькі дзён збіраюцца сімферопальцы, якія падтрымліваюць украінскіх вайскоўцаў. Сёння ўначы да гэтага месца падышлі прарасейскія дружыннікі, якія сталі правакаваць крымчан. Адзін з вайскоўцаў войскаў берагавой абароны патлумачыў, што галоўная мэта гэтых дружыннікаў не захоп будынка, а правакацыя. На месцы, дзе яны збіраюцца, застаюцца бутэлькі з-пад спіртнога.