«Прэзідэнцкія» дамы, якія пустуюць у аграгарадках, раскрадаюць

Мільярды рублёў выдаткаваныя на будаўніцтва так званых «прэзідэнцкіх» дамоў, пабудаваных па праграме адраджэння вёскі.

У СВК Ганцавіцкага раёна больш за дзесятак дамоў прастойваюць без жыхароў. За час прастою яны апынуліся цалкам непрыдатнымі для пражывання, паколькі былі развараваныя, пра што піша мясцовая газета «Ганцавіцкі час».

Ёсць дамы, якім няма і 10 гадоў з часу іх узвядзення, а яны ўжо не прыдатныя да пражывання, як, напрыклад, у СВК «Крышылавічы». Калісьці камфартабельнае жыллё цяпер без падлогі, катлоў, батарэй, праводкі, сантэхнікі. У дамах выбітыя вокны, выдраныя міжпакаёвыя дзверы.

«Адраджэнне вёскі» - менавіта з гэтай мэтай яшчэ ў сярэдзіне 90-х Лукашэнка запатрабаваў распрацаваць праекты сучаснага камфортнага жылля, якое, на яго думку, павінна было стаць стымулам для працы ў калгасе. У 2006 годзе, згодна з Указам Прэзідэнта РБ ад 25.03.2005 №150 «Аб Дзяржаўнай праграме адраджэння і развіцця вёскі на 2005 - 2010 гады», ва ўсіх калгасах пачалося будаўніцтва «прэзідэнцкіх» дамоў. У залежнасці ад перспектыў прадпрыемства і патрэбаў у спецыялістах, у кожнай гаспадарцы было даручана ўзвесці ў сярэднім па пяць дамоў. Для гэтай мэты калгасам былі прадастаўленыя льготныя крэдыты на 40 гадоў пад 3% гадавых.

Што цяпер засталося ад гэтых камфартабельных домікаў?

Карэспандэнт газеты пабывала ў вёсцы Востраў і «ацаніла», наколькі камфортнымі з'яўляюцца «прэзідэнцкія» домікі цяпер.

У адзін з іх, дарэчы, зусім новы, можна бесперашкодна пракрасціся праз аконны праём. Там нават цаглінкі складзеныя пад акном, каб лягчэй было ўвайсці. Дамы толькі звонку выглядаюць прыстойна, а вось ўнутры адвальваецца тынкоўка, прарэхі ў падлогах, вокнах, падмурку. І гэта яшчэ не ўсё. Практычна кожны нежылы дом «пазначаны» рукамі злодзеяў. Выламаныя дзверы, пабітыя вокны, жыўцом выламаная сантэхніка і праводка, адсутнасць катлоў, напаўразабраныя печкі.

Падобная сітуацыя, дзе гадамі пустуюць і прыходзяць у непрыдатнасць пабудаваныя па прэзідэнцкай праграме дамы, ёсць і ў іншых гаспадарках.