ЧФ Расеі затапіў свой карабель, заблакаваўшы ўкраінцам выхад у мора

Расейцы затапілі спісаны вялікі супрацьлодкавы карабель "Ачакаў" каля ўваходу ў возера Данузлаў.

Расейскія вайскоўцы сёння ноччу затапілі раней спісаны вялікі супрацьлодкавы карабель "Ачакаў" каля ўваходу ў возера Данузлаў, заступіўшы выхад у мора караблям Паўднёвай ваенна-марской базы Ваенна-марскіх сіл Узброеных сіл Украіны. Пра гэта УНІАН паведаміла ваенная крыніца ў Севастопалі.

Паводле яе дадзеных, учора пасля 23.00 у гарнізоне "Донузлаў" (пасёлак Наваазёрнае) пачалі пакідаць блокпасты вайскоўцы без знакаў адрознення.

Затым, прыкладна ў 23.30, зняліся з якароў і сышлі ў невядомым кірунку караблі ЧФ РФ (сярод іх ракетны крэйсер "Масква"), сваёй прысутнасцю некалькі дзён блакавалі выхад з возера ўкраінскім караблям.

Пасля гэтага расейскія вайскоўцы зацягнулі на буксір і паставілі паміж Паўночнай і Паўднёвай косамі на ўваходзе ў Данузлаў карабель "Ачакаў". "Прывязаўшы" яго да адной з раней выстаўленых двух бочак (гідратэхнічнае збудаванне для "прывязвання" да іх караблёў і судоў), яны з дапамогай супрацьпажарнага катэра пачалі напаўняць "Ачакаў" вадой для страты ўстойлівасці. Затым, па непацверджанай інфармацыі, прагучаў выбух, і карабель лёг на борт. Перад пачаткам гэтай аперацыі пражэктарамі расейскіх караблёў быў "аслеплены" назіральны пост ВМС Украіны.

Як дадаў суразмоўца агенцтва, глыбіня ў месцы затаплення складае 9-11 м, верхняя частка карабля бачная.

Пры цяперашніх абставінах выхад і ўваход у возера Данузлаў абсалютна выключаныя, а каб "Ачакаў" усплыў, спатрэбіцца нямала часу і вялікія фінансавыя выдаткі.

Па інфармацыі выдання blackseanews.net, ноччу перад уваходам у возера Данузлаў, дзе грунтуюцца караблі ВМС Украіны, Чарнаморскім флотам РФ былі падарваныя і затопленыя стары спісаны БПК "Ачакаў" і выратавальнае буксірнае судна "Шахцёр" са складу ЧФ РФ.

Фота: neftegaz.ru