Японія гатовая аказаць фінансавую дапамогу Украіне

Урад Японіі гатовы ўзяць удзел у аказанні фінансавай дапамогі Украіне і вызначыць канкрэтную суму на аснове кансультацый з МВФ.

Пра гэта заявіў у пятніцу журналістам у Токіо кіраўнік МЗС краіны Фуміа Кісіда, перадае УНІАН.

«Мы пазітыўна ставімся да фінансавай дапамогі Украіне, - адзначыў міністр. - Неабходная сума будзе вызначаная на падставе вынікаў працы даследчай місіі МВФ і кансультацый з самой Украінай».

Кіраўнік МЗС ухіліўся ад адказу на пытанне, ці мае намер Японія далучыцца да санкцый, уведзеных ЗША ў сувязі з становішчам ва Украіне. «Мы будзем адпаведным чынам рэагаваць на сітуацыю, якая складаецца, аналізуючы наяўныя тэндэнцыі і дзеянні розных дзяржаў», - дадаў міністр.

Ён падкрэсліў, што Токіо са шкадаваннем і заклапочанасцю сочыць за становішчам ва Украіне, і ў чарговы раз выказаўся за захаванне тэрытарыяльнай цэласнасці краіны.