Ва Украіне адключаюць расейскае ТБ

Абмежаванне працягнецца да ўрэгулявання сітуацыі ва Украіне.

Нацыянальная рада ў пытаннях тэлебачання і радыёвяшчання заклікала правайдэраў праграмнай паслугі часова ўстрымацца ад рэтрансляцыі ў сваіх сетках праграм тэлеканалаў Весці, Расея 24, ОРТ і РТР-Планета да прывядзення іх праграм у адпаведнасць з патрабаваннямі ўкраінскага заканадаўства. Пра гэта сказана ў заяве Нацыянальнай рады ў пытаннях тэлебачання і радыёвяшчання.

«Улічваючы зварот Рады нацыянальнай бяспекі і абароны Украіны ад 6 сакавіка і пастановы СНБА ад 1 сакавіка 2014 Аб неадкладных мерах забеспячэння нацыянальнай бяспекі, суверэнітэту і тэрытарыяльнай цэласнасці Украіны, Нацыянальная рада ў пытаннях тэлебачання і радыёвяшчання заклікае правайдэраў праграмнай паслугі часова ўстрымацца ад рэтрансляцыі ў сваіх сетках перадач тэлеканалаў Весці, Расія 24, ОРТ, РТР-Планета да прывядзення іх праграм у адпаведнасць з патрабаваннямі ўкраінскага заканадаўства. Дзяржава павінна стабілізаваць сітуацыю ва ўсіх рэгіёнах і забяспечыць інтарэсы ўсіх суполак», - адзначаецца ў паведамленні.

«Мы просім гледачоў усіх рэгіёнаў украінскай дзяржавы паставіцца з разуменнем да часовага кроку, які працягнецца да ўрэгулявання сітуацыі. Мы спадзяёмся на грамадзянскую адказнасць усіх удзельнікаў украінскага медыйнага рынку. Верым, што сумеснымі намаганнямі гэтага атрымаецца дасягнуць хутка», - падкрэслілі ў Нацыянальнай радзе.

Нагадаем, многія расейскія тэлеканалы падаюць у эфір непраўдзівую і скажоную інфармацыю пра падзеі ва Украіне.