Смаленская вобласць гатовая здаць зямлю ў арэнду беларусам

Смаленская вобласць гатовая выдзеліць сельгасарганізацыям Віцебшчыны свае зямлі ў арэнду.

Прапанову аб рэалізацыі супольнага праекта для вытворчасці беларускімі гаспадаркамі прадукцыі раслінаводства на тэрыторыі Смаленскай вобласці агучыў сёння ў Віцебску на сустрэчы з намеснікамі старшыні Віцебскага аблвыканкама Эдуардам Дзям'янавым і Анатолем Дзівуліным першы намеснік губернатара Смаленскай вобласці Міхаіл Піткевіч, паведамляе БелТА.

Паводле ягоных слоў, Адміністрацыя Смаленскай вобласці на надзвычай ільготных умовах гатовая выдзеліць фіксаваным коштам у арэнду на працяглы тэрмін - 7-10 гадоў (з варыянтам далейшага выкупу) - свае зямлі для вырошчвання прадукцыі раслінаводства беларускімі сельгаспрадпрыемствамі. Меркаваная арэндная плата складзе 300 расейскіх рублёў за 1 га пры рынкавым кошце 1 тысяча расейскіх рублёў за 1 га. Для пачатку Смаленскай вобласці ўжо цяпер гатовыя выдаць больш за 3 тысячы га зямельных надзелаў. Матэрыялы аб іх перададзеныя ў Віцебскі аблвыканкам. Далей гаворка можа ісці і аб 10 тысячах га, і пра 30 тысяч га - у залежнасці ад патрэб беларускіх партнёраў.

Супольную працу прапануецца весці паводле прынцыпу аднаго акна. У прыватнасці, з боку Адміністрацыі Смаленскай вобласці кіраваць гэтым праект будзе Дэпартамент сельскай гаспадаркі і харчавання. З беларускага боку прапануецца вызначыць юрыдычную асобу або сельгаспрадпрыемства, якое выступіць адзіным аператарам для працы ў Расеі і будзе падкантрольнае Віцебскаму аблвыканкаму. Такі прынцып працы стане гарантам моцнага супрацоўніцтва партнёраў і не паставіць мясцовыя органы ўлады ў залежнасць ад прыватнікаў, адзначыў першы намеснік губернатара Смаленскай вобласці.

"У нас дастаткова вялікая колькасць зямлі, якая апрацоўваецца неналежным чынам або зусім не апрацоўваецца. Мы зацікаўленыя ў прыходзе гульцоў, якія валодаюць тэхналогіямі ў гэтай сферы і жаданнем працаваць. Як у чыноўніка ў мяне адно жаданне - павялічыць сельскагаспадарчую плошчу, увесці невыкарыстоўныя зямлі ў сельгасабарачэнне", - падкрэсліў сваю зацікаўленасць у рэалізацыі гэтай прапановы Міхаіл Піткевіч. Ён выказаў гатоўнасць правесці ў Смаленску сустрэчу з кіраўнікамі памежных раёнаў Віцебскай і Смаленскай абласцей для дэталёвай прапрацоўкі шляхоў супрацоўніцтва ў гэтай сферы.

Эдуард Дзям'янаў падзякаваў за прапанову, адзначыўшы, што Віцебская вобласць зацікаўленая, як мінімум два памежныя раёны ўжо цяпер гатовыя разглядаць перспектывы супрацоўніцтва. Аднак для канкрэтнага адказу на пытанне аб супрацоўніцтве неабходна вывучыць і дэталёва прааналізаваць гэты праект з усіх бакоў. Сваю пастанову наконт гэтага пытання Віцебскі аблвыканкам агучыць падчас візіту віцебскай дэлегацыі ў Смаленск аб пытанні супольнай працы ў будаўнічай сферы, што запланаваны на другую палову траўня.