З захопленай гарадской рады Енакіева выгналі ўсіх баевікоў
10- 20.04.2014, 16:08
- 16,173
Усе сепаратысты, якія на працягу тыдня блакавалі адміністратыўны будынак, пакінулі яго і зніклі ў невядомым кірунку.
Пра гэта паведамляе мясцовае выданне «30 дзён».
Паводле інфармацыі выдання, у Енакіеве з самай раніцы над будынкам мясцовага выканкама паднятыя сцягі Украіны і Данецкай вобласці. Яшчэ ўчора на флагштоку выканкама віселі сцягі «Данецкай народнай рэспублікі», сёння іх месца заняў сцяг Украіны.
У самім будынку выканкама нікога няма. Перад уваходам у дзяржустанову туды-сюды ходзіць толькі адзін мужчына, які размаўляе па тэлефоне і не разумее, што адбылося.
«Я тэлефанаваў Сашу Грэку - у яго тэлефон адключаны. Потым я тэлефанаваў Жэню - ён сказаў, што разбярэцца. Я ўвогуле не разумею, што адбылося? Нейкая дыверсія. Не разумею, дзе ўсе нашы», - кажа чалавек, які быў разам з сепаратыстамі.
Таксама перад выканкамам стаіць пусты аўтамабіль патрульна-паставой службы. Побач з уваходам у выканкам знаходзіцца бочка са смеццем, за будынкам - кінутыя барыкады з шын і дровы.