У Менску п'яны пасажыр напаў на таксіста (Відэа)

Нецвярозы пасажыр напаў на таксіста і разбіў шкло яго аўтамабіля.

Карыстальнік форума onliner.by Mogdalov стаў відавочцам здарэння ў пятніцу на скрыжаванні сталічных вуліц Карла Маркса і Леніна. Таксіст спыніў аўтамабіль проста на праезнай частцы і выйшаў. Не зусім адэкватны мужчына ганяўся за кіроўцам вакол Lada Largus і ў выніку ўдарыў па машыне. Разбілася шкло з кіроўчага боку.

Дырэктар службы таксі паведаміў падрабязнасці інцыдэнту: «Пасажыр выклікаў таксі па тэлефоне, гэта значыць сеў не «ад борта». Кіроўца адразу заўважыў, што мужчына быў нецвярозы. Падчас паездкі ён паводзіў сябе з выклікам, стаў канфліктаваць з шафёрам, нападаць на яго. Таксіст адрэагаваў слушна: проста спыніўся, пакінуў машыну сам, папрасіў выйсці пасажыра. Той паспрабаваў дагнаць нашага супрацоўніка. Яны бегалі вакол Lada, пакуль нецвярозы мужчына не выбіў шкло. Пасля гэтага кіроўца выклікаў міліцыю».

«Вельмі хутка прыехаў нарад АМАПа, пасажыра затрымалі, - распавялі ў службе таксі. - У дачыненні да яго склалі пратакол. Сёння днём ён звязаўся з кіроўцам па тэлефоне і ў размове папрасіў урэгуляваць справу без суда. Паабяцаў аднавіць шкло за свой кошт».

У цэлым, па словах дырэктара службы, падобныя інцыдэнты адбываюцца ў сталіцы кожны дзень. Прасачыць якую-небудзь тэндэнцыю складана: на жаль, нельга сказаць, што ў апошнія гады пасажыры сталі больш дысцыплінаванымі, скаргаў ад таксістаў менш не стала. З іншага боку, гэта можна растлумачыць і тым, што павялічылася колькасць машын. У сярэднім сталічныя таксісты фіксуюць прыкладна 1-2 выпадкі нападу, пагрозы або неадэкватных паводзінаў пасажыраў па буднях, у пятніцу і суботу - часцей.

Гэта далёка не адзіны інцыдэнт на дарогах Менска з удзелам п'яных людзей, які адбыўся за мінулыя выходныя. Учора пасля сваркі нецвярозая дзяўчына выбегла на МКАД, дзе яе збіў Audi. А ў ноч з пятніцы на суботу на вул. Слабадской інспектары затрымалі вінаватага аварыі, які знаходзіўся ў стане алкагольнага ап'янення. «Адзін з удзельнікаў прытармазіў перад скрыжаваннем, каб павярнуць у двор, - распавяла Любоў Трэпашка, старэйшы інспектар аддзела агітацыі і прапаганды ДАІ Маскоўскага раёна. - У гэты момант у заднюю частку кузава гэтага аўтамабіля ўрэзаўся Opel Omega. За рулём знаходзіўся малады чалавек 1985 г. н. На медаглядзе аказалася, што ў яго арганізме было 2 праміле алкаголю. Ён прызнаўся, што выпіў 50 грам гарэлкі і 200 грам піва на дне народзінаў таварыша, які адзначаўся ў парку непадалёк ад месца аварыі».