Крыс Мэрфі: Самы час зрабіць больш жорсткімі санкцыі супраць расейскіх банкаў
3- 22.04.2014, 11:28
- 4,973
Члены камітэта па міжнародных справах Сената ЗША заклікалі ўзмацніць санкцыі ў дачыненні да Расеі.
"Я думаю, цяпер самы час зрабіць больш жорсткімі санкцыі, будзь то ў дачыненні да расейскіх нафтахімічных кампаній, альбо расейскіх банкаў, - заявіў сенатар-дэмакрат Крыс Мэрфі. - Так, пры ўзмацненні жорсткасці санкцый Еўропа эканамічна пацерпіць. Але настаў і для іх час выступіць наперад". Палітыка цытуе ўкраінская служба "Радио Свабода".
Сенатар-рэспубліканец Боб Коркер, са свайго боку, заявіў, што да таго часу, пакуль Расея "не пачне адвод 40 тысяч сваіх вайскоўцаў ад мяжы з Украінай, прысутнасць якіх палохае жыхароў Украіны, мы павінны ўвесці санкцыі супраць некаторых кампаній энергетычнага сектара Расеі і іншых".
"Я лічу, мы павінны ўдарыць па буйных банках", - адзначыў ён.
Прэзідэнт Барак Абама раней заяўляў, што адміністрацыя ЗША гатовая да далейшых дзеянняў супраць Расеі ў выпадку правалу дыпламатычных намаганняў.
Міністр абароны ЗША Чак Хейгел на мінулым тыдні паведаміў, што ЗША шукаюць спосабы запэўніць сваіх саюзнікаў па НАТА ў калектыўнай абароне.
Раней прэс-сакратар Пентагона казаў, што ЗША разглядаюць шэраг дадатковых мер па ўмацаванні паветранай, марской і наземнай боегатоўнасці Еўропы. ЗША разглядаюць варыянт адпраўкі 150 вайскоўцаў для правядзення наземных ваенных вучэнняў у Польшчы і Эстоніі, якія будуць доўжыцца каля двух тыдняў і будуць аднаўляцца перыядычна, магчыма, і на тэрыторыі іншых краін-членаў НАТА, гаворыцца ў паведамленні.