Беларуска стала самай хуткай еўрапейкай на марафоне ў Бостане

Аляксандра Дуліба заняла 6 месца на Бостанскім марафоне.

Паказаўшы вынік 2 гадзіны 21 хв. 29 сек., яна ўстанавіла новы рэкорд Беларусі па марафонскім бегу, палепшыўшы сваё ж ранейшае дасягненне (2:23.44). Па ўжо існуючай традыцыі ў лідарах на Бостанскім марафоне апынуліся прадстаўніцы Афрыкі. Пераможцай стала Рыта Джэпту з Кеніі - 2:18.57, срэбра ў Бузунэш Дэбуа з Эфіопіі - 2:19.59, а трэцяй фінішавала яе суайчынніца Марэ Дзібаба - 2:20.35, перадае БелТА.

У мужчын на класічнай марафонскай дыстанцыі 42 км 195 м упершыню за апошнія 30 гадоў чэмпіёнам стаў ураджэнец Эрытрэі, а цяпер прадстаўнік ЗША Мэб Кефлезігі, які паказаў вынік 2:08.37. Услед за ім да фінішу прыйшлі кенійскія бегуны - Уілсан Чэбет (2:08.48) і Франклін Чэпквоні (2:08.50). Затым фінішную рысу перасёк украінскі спартсмен Віталь Шафар, які паказаў вынік 2:09.38.

Цяперашні 118-ы Бостанскі марафон праходзіў ва ўмовах небывалых мер бяспекі пасля мінулагодняга тэракту, у выніку якога загінулі тры чалавекі і сотні атрымалі раненні. У гэтым годзе ў спаборніцтвах узялі ўдзел каля 36 тыс. спартсменаў з усяго свету - на траціну больш, чым год таму. На дыстанцыі за прабегам назіралі каля мільёна гледачоў, ніякіх сур'ёзных інцыдэнтаў не адбылося.