Баявікі ў Славянску ўзялі ў закладнікі журналіста і падпалкоўніка міліцыі
4- 22.04.2014, 21:22
- 9,292
Самаабвешчаны «мэр» Славянска паведаміў, што дыверсанты ўзялі ў закладнікі амерыканскага журналіста Саймана Астроўскага.
Пра гэта Вячаслаў Панамароў заявіў падчас прэс-канферэнцыі ў Доме культуры Славянска, піша gazeta.ru. Паводле ягоных слоў, у Саймана Астроўскага падвойнае грамадзянства ЗША і Ізраіля, ён з'яўляецца супрацоўнікам амерыканскага выдання Vice.
Адзначаецца, што прэс-канферэнцыя была ненадоўга перапыненая, Панамарову патэлефанавалі бацькі журналіста, лідар сепаратыстаў Славянска запэўніў, што з іх сынам усё добра.
«Яго ніхто не выкрадаў, яго ніхто не трымае ў закладніках, ён цяпер у нас, у СБУ, рыхтуе матэрыял, працуе», - сказаў Панамароў.
Акрамя таго, паводле паведамлення выдання Преступности.net, якое спасылаецца на крыніцы ў ГУМВД Украіны ў Данецкай вобласці, увечары 19 красавіка сепаратысты выкралі начальніка лінейнага аддзела міліцыі станцыі Славянск падпалкоўніка Алега Прохарава.
Паводле інфармацыі суразмоўцы выдання, пад 17 гадзін невядомыя ў масках, узброеныя аўтаматычнай зброяй, уварваліся ў дом да Прохарава і на вачах у жонкі і дваіх дзяцей выкралі яго і павезлі ў невядомым кірунку.
«Прохараў супраціўляўся, аднак колькасная перавага нападнікаў не пакінула яму ніякіх шанцаў», - адзначыла выданне.
Інфармацыю аб знікненні міліцыянта пацвердзіла начальніца сектара сувязяў з грамадскасцю УМВД Украіны Данецкай чыгункі Вольга Чарнагорыя.
«Прохараў знаходзіўся на лістку непрацаздольнасці. У другой палове дня 19 красавіка ён выйшаў на вуліцу і не вярнуўся. На гэты момант сувязі з ім няма, пра яго месцазнаходжанне нічога невядома», - паведаміла яна.
Цяпер, са слоў Чарнагор, міліцыя праводзіць мерапрыемствы для ўстанаўлення ўсіх абставінаў знікнення начальніка лінейнага аддзела міліцыі станцыі Славянск. Крымінальная справа яшчэ не пачатая.