У Віцебску адкрылі Музей шакаладу

Музей будзе працаваць да 18 ліпеня.

Прэзентацыя экспанатаў таварыства з абмежаванай адказнасцю "Музей шакаладу" адбылася ў Мастацкім музеі, перадае БелТА.

"Музей шакаладу створаны ў Віцебску пад дэвізам "Мы робім дабро". Усе экспанаты (цяпер іх некалькі дзесяткаў) створаныя таленавітым шакалацье Мікалаем, які праходзіў стажыроўку ў Французскай акадэміі шакаладу, удасканальваў майстэрства ў Польшчы. Музей будзе дзейнічаць у Віцебску з 25 красавіка па 18 ліпеня. У гэты час тут будуць арганізаваныя аўтарскія вечары майстра, дабрачынныя акцыі, майстар-класы для дзяцей і дарослых. Жыхароў Віцебска чакае шмат сюрпрызаў, самы цікавы запланаваны на 11 ліпеня - дзень, калі святкуецца Сусветны дзень шакаладу", - распавяла дырэктар ТАА Любоў Іванова і падкрэсліла, што ўсе прадстаўленыя экспанаты зробленыя спецыяльна для беларускага музея шакаладу ў майстэрні шакалацье Мікалая, якая знаходзіцца ў Віцебску.

Шакаладных спраў майстар адзначыў, што галоўная яго задача - раскрыць розныя ракурсы шакаладу, каб людзі маглі атрымліваць асалоду ад не толькі яго смаку, але і выгляду.

"Тут можна ўбачыць розныя тэхнікі - гэта лепка з шакаладу, ліццё. Кожны тыдзень будуць з'яўляцца новыя эксклюзіўныя рэчы, у тым ліку пляценне і карціны, напісаныя шакаладам па шакаладзе", - запэўніў Мікалай і падкрэсліў, што ўсе творы выкананыя з беларускага харчовага шакаладу без якіх-небудзь прымешак. Таму, каб зберагчы экспанаты і не спакушаць наведвальнікаў, у музеі ўсталююць спецыяльныя агароджы.

Музеі шакаладу ёсць у многіх краінах свету. Самыя вядомыя знаходзяцца ў Аўстрыі, Чэхіі, Германіі, Швейцарыі, Бельгіі, Іспаніі, Расеі (Санкт-Пецярбург і Масква).