Расейская бронетэхніка ўчыняе ДТЗ у Растоўскай вобласці

Дзве аварыі з удзелам ваеннай тэхнікі, якую перакідалі да межаў Украіны, адбыліся пад Растовам.

У выніку чатыры чалавекі загінулі, а супрацоўнік ДІБДР атрымаў раненне, паведамляе «Інтэрфакс» са спасылкай на крыніцу ў сілавых структурах рэгіёну.

У першым выпадку баявая машына пад кіраваннем механіка-кіроўцы зачапіла аўтамабіль ДПС, які стаяў на абочыне.

«У выніку адзін мясцовы жыхар, які знаходзіўся побач з аўтамабілем, ад атрыманых траўмаў памёр, а інспектар ДПС, паліцыянт, шпіталізаваны», - распавяла крыніца.

Яшчэ адно ДТЗ з удзелам баявой тэхнікі адбылося ў Акцябрскім раёне Растоўскай вобласці на федэральнай дарозе Растоў - Масква: кіроўца БТР выехаў на сустрэчную паласу і ўрэзаўся ў легкавую машыну. Ахвярамі здарэння сталі двое мясцовых жыхароў, якія знаходзіліся ў аўтамабілі, а таксама вайсковец-кантрактнік, які кіраваў БТР.

Нагадаем, учора міністр абароны Расеі Сяргей Шайгу заявіў пра пачатак ваенных вучэнняў батальённых і тактычных груп Паўднёвай і Заходняй ваенных акругаў Расеі ў прымежных з Украінай раёнах. Ён назваў прычынай вучэнняў павелічэнне колькасці ўкраінскіх войскаў на ўсходзе Украіны, якія нібыта будуць прымяняць зброю супраць «мірных» грамадзян у Данбасе, маючы на ​​ўвазе ўзброеных да зубоў апошнімі навінкамі агнястрэльнай зброі і гранатамётамі баевікоў, якія фінансуюцца Расеяй.