Лідары ЗША і ЕЗ падтрымалі новыя санкцыі супраць Расеі
15- 25.04.2014, 18:42
- 32,592
Лідары ЗША, Нямеччыны, Францыі, Італіі і Вялікабрытаніі правялі тэлефонныя перамовы.
Падчас іх кіраўнікі дзяржаў выказаліся за ўвядзенне новых санкцый супраць Расеі, паведамляе прэс-служба Елісейскага палаца.
Прэзідэнт Францыі Франсуа Аланд, канцлерка Нямеччыны Ангела Меркель, прэзідэнт ЗША Барак Абама, прэм'ер-міністры Вялікабрытаніі Дэвід Кэмерон і Італіі Матэа Рэнца падкрэслілі важнасць выканання дамоўленасці ў развязанні крызісу ва Украіне, якая дасягнутая ў Жэневе.
«Расея, у адпаведнасці з абавязальніцтвамі, якія прынятыя ў Жэневе, павінна спрыяць дээскалацыі, устрымліваючыся ад правакацыйных заяў або запалохвання. Тэрытарыяльная цэласнасць і суверэнітэт Украіны павінны цалкам захоўвацца. Кіраўнікі дзяржаў і ўрадаў заклікалі краіны «сямёркі» да хуткай рэакцыі (на падзеі ва Украіне, - заўвага) і прапанавалі прыняць новыя санкцыі з боку міжнароднай супольнасці ў дачыненні да Расеі», - гаворыцца ў заяве паводле вынікаў перамоваў.
Удзельнікі перамоваў дамовіліся таксама аб неабходнасці пашырэння місіі АБСЕ ва Украіне.
Нагадаем, учора пра гатоўнасць прымяніць новыя санкцыі ў дачыненні да Расеі заявіў міністр замежных спраў Канады Джон Бэрд.