Да восені мабілізаваных украінцаў заменяць кантрактнікі

Міністэрства абароны мае намер да верасня замяніць ўсіх вайсковаабавязаных рэзерву, прызваных на час частковай мабілізацыі, жаўнерамі кантрактнай службы.

Пра гэта гаворыцца ў паведамленні на сайце ведамства выконваючага абавязкі міністра абароны Міхаіла Каваля.

«Шэраг мер дазволіць нам прыняць (на службу) вайсковаслужачых паводле кантракту, падрыхтаваць гэтых вайсковаслужачых, і да верасня замяніць ўсіх, хто выслужыў ўстаноўленыя тэрміны, а таксама тых, хто прыйшоў паводле частковай мабілізацыі. Гэта ўжо зацверджана кіраўніцтвам дзяржавы і дазволіць нам трымаць Узброеныя сілы Украіны на досыць высокім узроўні баявой гатоўнасці», - паведаміў генерал-палкоўнік. Пры гэтым, Каваль сцвярджае, што ўкраінская армія на дадзеным этапе здольная адбіць магчымае вайсковае ўварванне Расеі.

«На сённяшні дзень усе віды Узброеных сіл цалкам гатовыя да адлюстравання верагоднай агрэсіі. Разам з начальнікам Генеральнага штаба УС Украіны мы рыхтавалі войскі да самага горшага варыянту, да магутнай агрэсіі», - адзначыў ён.

У той жа час, кіраўнік ведамства рашуча зняпраўджвае інфармацыю, што расейскія вайсковыя самалёты несанкцыянавана перасякалі ўкраінскую мяжу. На яго думку, такая дэзінфармацыя распаўсюджваецца свядома для зрыву антытэрарыстычнай аперацыі ўкраінскіх праваахоўнікаў у Данецкай вобласці. Пры гэтым некалькі расейскіх самалётаў 24-25 красавіка курсіравалі ўздоўж украінскіх межаў.

«Чатыры самалёты вайскова-транспартнай авіяцыі Іл -76 рухаліся ўздоўж нашай дзяржаўнай мяжы, але лінію мяжы не перасякалі. Такія дзеянні былі дэманстратыўнымі, каб прымусіць кіраўніцтва дзяржавы і сілавых структур адмовіцца ад правядзення антытэрарыстычнай аперацыі», - паведаміў Каваль.

Ён падкрэсліў, што АТА працягваецца, але не імклівымі тэмпамі, так як сепаратысты захапілі ў закладнікі шмат грамадзянскіх і вайсковых асоб, у прыватнасці, вайсковых назіральнікаў АБСЕ і 2 украінскіх вайскоўцаў.