Уільям Хейг: Кошт для Расеі будзе расці
8- 27.04.2014, 14:55
- 9,592
Новыя санкцыі супраць Расейскай Федэрацыі будуць пашырэннем ужо існуючых, уключаючы візавую забарону і замарожванне актываў расейцаў.
Пра гэта заявіў міністр замежных спраў Вялікабрытаніі Уільям Хейг у інтэрв'ю Sky News.
Са слоў Хейга, Еўропа і ЗША працуюць таксама над больш жорсткімі эканамічнымі, гандлёвымі і фінансавымі санкцыямі, аднак іх прыняцце - пытанне будучыні, а не бліжэйшага часу.
«Мы працягнем распрацоўваць дадатковыя санкцыі, цана для Расеі (за яе дзеянні - рэд.) будзе расці», - цытуе Хейга расейская служба Бі-бі-сі.
Нагадаем, у нядзелю прэзідэнт ЗША Барак Абама заявіў, што прыняцце санкцый у дачыненні да розных сектараў расейскай эканомікі залежыць ад таго, ці змогуць амерыканцы і іх саюзнікі выпрацаваць адзіную пазіцыю ў гэтым пытанні.
Напярэдадні лідары краін G7 дамовіліся дзейнічаць хутка ў пытанні новых санкцый супраць Расеі. Як адзначана ў заяве, краіны «Вялікай сямёркі» - ЗША, Нямеччына, Японія, Вялікабрытанія, Францыя, Італія і Канада - гатовыя ўзмацніць санкцыі супраць РФ «з улікам неабходнасці забеспячэння мірных выбараў ва Украіне ў наступным месяцы».
Аб новых санкцыях у дачыненні да Расеі, як чакаецца, будзе абвешчана ўжо ў панядзелак.