Алігарху Фірташу пагражае экстрадыцыя ў ЗША і канфіскацыя ўсіх актываў

У траўні аўстрыйскі суд разгледзіць пытанне экстрадыцыі набліжанага да Януковіча алігарха ў ЗША.

Пра гэта паведамілі ў Зямельным судзе Вены. Усе неабходныя для гэтага дакументы ад Федэральнага бюро расследавання ЗША ўжо паступілі, паведамляе Deutsche Welle.

Сёння мультымільярдэр знаходзіцца ў чаканні суда. Але ўкраінскі алігарх чакае разгляду справы не ў следчым ізалятары, а ў сваёй венскай рэзідэнцыі, выплаціўшы заклад у рэкордныя для аўстрыйскага правасуддзя 125 млн еўра. Да сваёй абароны Дзмітрый Фірташ падключыў знакамітых юрыстаў, яго адвакатам у судзе выступаць былы міністр юстыцыі Аўстрыі Дытэр Бемдорфэр.

Алігарху пагражае зняволенне на некалькі дзесяткаў гадоў за стварэнне злачыннай групоўкі і адмыванне сродкаў. Максімальны сукупны тэрмін па злачынствах, якія інкрымінуюць алігарху, складае 50 гадоў.

Крымінальную справу супраць Фірташа следчыя ФБР расследавалі на працягу некалькіх гадоў. Каб разблытаць клубок карупцыйных схем, якія прыпісваюць яму, за украінскім алігархам вялося пільнае назіранне.

Агенты ФБР, як вынікае з матэрыялаў справы, чыталі перапіску па электроннай пошце, праслухоўваўся мінімум адзін мабільны тэлефон.

Але больш усяго дзівіць праца следчых па ўзнаўленні грашовых патокаў паміж афшорным кампаніямі, з якіх, верагодна, ажыццяўляўся подкуп чыноўнікаў у Індыі. Пры тым, што, відавочна, рабілася ўсё, каб заблытаць сляды. Згодна з матэрыяламі крымінальнай справы, магчымыя хабары паступалі на падстаўныя фірмы, падкантрольныя індыйскім змоўшчыкам, на працягу 2006-2010 гадоў сумамі ад 20 тысяч да 200 тысяч даляраў. Усяго ў матэрыялах справы фігуруюць 57 транзакцый.

Сабраныя амерыканскімі следчымі матэрыялы могуць стаць падставай для адкрыцця цэлага шэрагу крымінальных спраў. ФБР мае інфармацыю пра ўсе падкантрольныя Дзмітрыю Фірташу кампаніі, у тым ліку тыя, якія не з'яўляюцца публічнымі і аформленыя ў афшорах на падстаўных асоб. Усяго з Фірташам звязваюць паўтары сотні - пераважна афшорных - кампаній. 89 з іх зарэгістраваныя на Кіпры, астатнія - у Аўстрыі, у Германіі, Швейцарыі, Венгрыі, на Брытанскіх Віргінскіх выспах, у Вялікабрытаніі, Нідэрландах і на Сейшэльскіх астравах.

Устаноўлена таксама, што Фірташ меў 41 банкаўскі рахунак у гэтых краінах.

Самы нечаканы для ўкраінскага алігарха паварот заключаецца ў тым, што ўсе сродкі на рахунках і ўсе фірмы, на якія аформленыя буйныя прамысловыя актывы, СМІ і нерухомасць ва Украіне і ва ўсім свеце ФБР патрабуе канфіскаваць на карысць Злучаных Штатаў.

Пры гэтым у ФБР спасылаюцца на заканадаўства ЗША, якое дае магчымасць канфіскоўваць актывы кампаній, якія былі задзейнічаныя ў карупцыйных правапарушэннях і адмыванні грошай. Гаворка ідзе пра закон (Title 18 United States Code, Section 1962/1963), які распаўсюджваецца не толькі на злачынствы, учыненыя ў Злучаных Штатах. Дастаткова, каб ад карупцыйных правапарушэнняў панеслі страты амерыканскія кампаніі і (або) каб да падрыхтоўкі і рэалізацыі правапарушэння былі прыцягнутыя рэсурсы на тэрыторыі ЗША. У выпадку Фірташа для крымінальнай справы было дастаткова таго, што ў рамках падрыхтоўкі злачынства члены "крымінальнай групоўкі Фірташа", у прыватнасці, праводзілі шэраг сустрэч на тэрыторыі Злучаных Штатаў, выкарыстоўвалі для перапіскі інтэрнэт і электронную пошту амерыканскіх правайдэраў, а для подкупу індыйскіх чыноўнікаў карысталіся паслугамі фінансавай сістэмы ЗША. І гэта пры тым, што ў кампаній Фірташа няма ніякіх рахункаў у Злучаных Штатах. Гаворка ідзе, відавочна, пра выкарыстанне пры ажыццяўленні міжнародных пераводаў фірмамі Фірташа карэспандэнцкіх рахункаў у ЗША.

Нагадаем, што крымінальная справа супраць Дзмітрыя Фірташа тычыцца падазрэння ў стварэнні злачыннай групоўкі і подкупе прадстаўнікоў мясцовай улады у адным са штатаў Індыі, а таксама прадстаўнікоў цэнтральнай улады краіны. Паводле матэрыялаў следства, для атрымання дазволаў на здабычу сыравіны, неабходнай для вытворчасці тытанавых сплаваў, Фірташам праз пасярэднікаў былі перададзеныя хабары на суму ў менш 18,5 млн даляраў. Следчыя не выключаюць, што сума магла быць і больш, улічваючы чаканы штогадовы даход ад здабычы ў Індыі каля паўмільярда даляраў у год.

Фота: PHL