Луганскія міліцыянты: Улада нам здраджвае

Супрацоўнікі міліцыі на ўсходзе Украіны кажуць пра адсутнасць падтрымкі з боку Кіева.

Пра гэта The Guardian заявіла прэс-сакратар абласнога ўпраўлення МУС у Луганскай вобласці Таццяна Пагукай, піша "Украинская правда".

"Мы ўсё яшчэ тут. Мы не здаліся. Але Кіеў здрадзіў нам", - сказала яна.

Пагукай падкрэсліла, што луганская міліцыя з гонарам абараняла будынак упраўлення і ўсё яшчэ кантралюе памяшканне. Пры гэтым яна выказала абурэнне заявамі ўладаў, у якіх яны назвалі праваахоўнікаў усходу краіны "здраднікамі".

"Спачатку нам здрадзіў Януковіч. Цяпер - Турчынаў. Гэта на яго сумленні", - сказала Пагукай.

Паводле яе слоў, падчас штурму з боку сепаратыстаў міліцыянтам патэлефанаваў намеснік кіраўніка МУС. Ён прапанаваў падтрымку. Аднак, як адзначыла Пагукай, больш ніхто з Кіева не адважыўся патэлефанаваць ім.

"Мы не здадзімся. Мы будзем змагацца да апошняга ўздыху", - адзначыла яна.

Нагадаем, 29 красавіка ў Луганску амаль 3 тысячы па-прарасейску настроеных сепаратыстаў са зброяй спрабавалі захапіць будынак Галоўнага ўпраўлення МУС Украіны ў Луганскай вобласці. Сярод мітынгоўцаў было каля 50 чалавек у камуфляжы, бронекамізэльках, касках, масках і з аўтаматамі.

З боку міліцыі былі ўжытыя гранаты, эктремисты кідалі "кактэйль Молатава" ў бок міліцыі, затым адбыўся не занадта масіраваны абстрэл будынка. Натоўп скандаваў: "Расея", "Данбас". На будынку міліцыі, як і на ўсіх іншых захопленых аб'ектах, усталявалі сцяг Расейскай Федэрацыі.