Сепаратысты захапілі будынкі МУС і пракуратуры ў Данецку (Відэа)

Падчас штурму пракуратуры некалькі чалавек атрымалі раненні.

Першамайская дэманстрацыя, якую арганізавалі ў Данецку прарасейскія сілы, скончылася сутыкненнямі.

Каля 5 тысяч прыхільнікаў самаабвешчанай «Данецкай народнай рэспублікі» пачалі шэсце ў цэнтры горада. Яны вылучыліся па вуліцы Арцёма ад захопленага будынка Данецкага аблсавета ў бок плошчы Леніна, перакрыўшы праезную частку. Пасля гэтага натоўп падышоў да будынка абласнога ўпраўлення МУС і пад пагрозай штурму прымусіў падняць сцяг самаабвешчанай «Данецкай народнай рэспублікі».

Верхаводы сепаратыстаў, якія выступалі на мітынгу ля аддзялення міліцыі, заклікалі прысутных ісці да пракуратуры. Прыкладна ў 15:20 па мясцовым часе натоўп, у якім было шмат узброеных бітамі людзей у масках, падышоў да будынка.

Як было відаць з анлайн-трансляцыі, там іх сустрэлі шэрагі міліцыі са шчытамі. Баевікі сталі закідваць іх камянямі і выбуховымі пакетамі. У адказ супрацоўнікі міліцыі ўжылі слёзацечны газ. Сутыкненне паміж імі і сепаратыстамі працягвалася некалькі хвілін. У выніку некалькі чалавек з абодвух бакоў атрымалі раненні.

Праз некаторы час супрацоўнікі міліцыі зайшлі ў будынак, а сепаратысты заявілі пра тое, што да іх ідзе «падмога» з захопленай раней абласной адміністрацыі.

Відавочцы ў сацыяльных сетках паведамляюць, што падчас першай спробы ўварвацца ў будынак баевікі забралі ў міліцыянтаў каля дваццаці шчытоў і іншую амуніцыю.

Як піша мясцовае выданне «Остров», пляцоўка перад пракуратурай ў дыме. Выбраны брук каля трамвайных шляхоў. Бліжэйшыя крамы зачыніліся. Па папярэдніх дадзеных, ёсць параненыя сярод салдат унутранай службы і сярод нападнікаў. На месца падзей прыехалі аўтамабілі хуткай дапамогі.

Другая спроба штурму скончылася захопам будынка. Баевікі ўварваліся спачатку на першы паверх. Потым была занятая ўся пракуратура. Салдаты ўнутраных войскаў і міліцыя пакінулі будынак.

Тры карэты «хуткай дапамогі», якія прыбылі на месца, павезлі пацярпелых у бальніцы, іх стан на дадзены момант невядомы. Сепаратысты ўсталявалі на будынку свае сцягі. Усяго пад пракуратурай каля тысячы прыхільнікаў самаабвешчанай «Данецкай рэспублікі». Многія з іх са шчытамі і ў шлемах, адабраных у салдат унутраных войскаў.

Хуткая па вуліцы Чалюскінцаў аказвае дапамогу пацярпелым.