Жанчына ўпершыню ўзначаліць міратворцаў ААН
- 13.05.2014, 9:43
- 4,981
Нарвежка Крысцін Лунд зменіць генерал-маёра з Кітая Чао Ліу на пасадзе камандуючага сіламі ААН на Кіпры.
Генеральны сакратар ААН Пан Гі Мун прызначыў генерал-маёра Крысцін Лунд, ураджэнку Нарвегіі, Камандуючым Узброенымі сіламі Арганізацыі Аб'яднаных Нацый па падтрыманні міру на Кіпры, паведамляе цэнтр навін ААН.
Паводле паведамлення, у Крысцін Лунд за плячыма - 34 гады ваеннай службы і ўдзелу, як у нарвежскіх, так і міжнародных ваенных аперацыях, у тым ліку - у сілах ААН і НАТА.
Крысцін Лунд скончыла дзве нарвежскіх ваенных ВНУ, а таксама атрымала ступень магістра стратэгічных даследаванняў у Ваенным каледжы Узброеных сіл ЗША.
У шэрагі Узброеных сіл Нарвегіі Крысцін Лунд уступіла яшчэ ў 1980 годзе. З 2007 года яна была намеснікам галоўнакамандуючага УС Нарвегіі, а ў 2009 годзе стала першай жанчынай у гісторыі краіны, якую ўзвялі ў званне генерал-маёра і прызначылі на пасаду Начальніка штаба войскаў мясцовай абароны.
Узброеныя сілы ААН на Кіпры былі першапачаткова заснаваныя Радай Бяспекі ў 1964 годзе з мэтай прадухілення новых узброеных сутыкненняў паміж суполкамі кіпрыётаў-грэкаў і кіпрыётаў-турак. Пасля баявых дзеянняў 1974 года Рада ўсклала на Сілы выкананне некаторых дадатковых функцый.
У адсутнасць палітычнага ўрэгулявання кіпрскай праблемы УСААНК працягваюць заставацца на выспе ў мэтах назірання за лініямі спынення агню, падтрымання буфернай зоны, правядзення гуманітарных акцый і аказання падтрымкі місіі добрай волі Генеральнага сакратара.