Новыя санкцыі Захаду разбураць расейскую вытворчасць

Захад пакіне Расею без перадавых тэхналогій.

ЗША і іх галоўныя еўрапейскія саюзнікі рыхтуюць больш шырокія санкцыі ў дачыненні да расейскай эканомікі. Гаворка ідзе пра магчымую забарону на экспарт у Расею высокатэхналагічнага абсталявання ў сферы энергетыкі, калі Масква паспрабуе перашкодзіць правядзенню выбараў ва Украіне 25 траўня, піша Financial Times.

Захад падтрымлівае прэзідэнцкія выбары як спосаб вярнуць легітымнасць уладам у Кіеве, нават ва ўмовах, калі сепаратысцкія лідары ў Данецку на ўсходзе Украіны просяць Расею анэксаваць гэтую тэрыторыю пасля ўпэўненай, на іх думку, перамогі на самаабвешчаным нядзельным «рэферэндуме», перадае ИноСМИ. ЗША, Вялікабрытанія і Францыя папярэджваюць, што крамлёўскія спробы сарваць прэзідэнцкія выбары на Украіне прывядуць да «трэцяй фазы» санкцый - больш шырокіх, чым меры супраць асобных людзей і кампаній. Маюцца на ўвазе санкцыі супраць цэлых эканамічных сектараў.

Адзін з варыянтаў - забарона на экспарт высокатэхналагічнага абсталявання ў сферы энергетыкі ў Расею, што абцяжарыць спробы краіны выйсці за межы традыцыйнай вытворчасці і рынкаў збыту.

У ЗША гэты план можа быць увасоблены ў жыццё ў форме новых патрабаванняў да экспартных ліцэнзій, падобных на тыя, якія ўжо былі ўведзеныя ў сферы экспарту ваенных тэхналогій. Існуючыя праекты пад забарону не патрапяць, аднак любыя новыя праграмы альбо сутыкнуцца з дадатковымі праверкамі, альбо будуць заблакаваныя.

Супраць гэтых планаў выступае Італія - адзін з членаў «Вялікай сямёркі» - у той час як міністры замежных спраў краін ЕЗ так і не прыйшлі да згоды з нагоды таго, што менавіта стане падставай для пачатку трэцяга этапу санкцый. 28 дзяржаў-членаў ЕЗ толькі дамовіліся пра тое, што яны будуць «звяртаць асаблівую ўвагу на стаўленне і паводзіны ўсіх бакоў» да ўкраінскіх выбараў, прымаючы рашэнне аб будучых санкцыях.

Міністры ЕЗ усё ж пагадзіліся ўвесці візавыя абмежаванні і замарозіць актывы яшчэ 13 расейцаў і дзвюх кампаній у Крыме, які Масква анэксавала ў сакавіку.

Радаслаў Сікорскі, міністр замежных спраў Польшчы, заявіў, што ўсё яшчэ ёсць спосаб пашырыць санкцыі «другога этапа».

«Я думаю, што мы можам распачаць больш разумных, карысных і эфектыўных мер у рамках другога этапу санкцый», - сказаў ён, дадаўшы, што любыя меры супраць цэлых сектараў эканомікі павінны быць старанна прадуманыя. «Трэба дзейнічаць асцярожна, каб не нашкодзіць сабе больш, чым іншаму боку», - адзначыў Сікорскі.

Забарона на экспарт тэхналогій у нафтагазавай сферы ў Расею можа аказаць значны эфект на расейскую прамысловасць, хоць і не прывядзе да неадкладнага спынення экспарту вуглевадародаў.

Марк Дубовіц з даследчага Фонду абароны дэмакратый заявіў, што такі крок падобны да прынятых раней мер супраць Ірана. «У доўгатэрміновай перспектыве ён будзе мець разбуральны эфект на расейскую вытворчасць, аднак не прывядзе да неадкладнага спынення экспарту», - кажа ён.

Расея імкнецца распрацаваць новыя радовішчы: гаворка ідзе пра Бажэнаўскую світу ў Сібіры і Карскім моры ў Арктыцы. Гэта будзе вельмі складана зрабіць без самых сучасных заходніх тэхналогій і ведаў.

Робін Уэст з Цэнтра стратэгічных і міжнародных даследаванняў, яшчэ аднаго даследчага інстытута, кажа, што ў той час як ідэя байкатаваць расейскую нафту і газ - гэта «нонсэнс», забарона на экспарт ключавых тэхналогій стане «сфакусаваным» спосабам аказаць ціск на Расею.

«Гэта акажа значны ўплыў на будучы экспарт нафты і газу, абмежаваўшы здольнасць Пуціна здзяйсняць буйныя здзелкі з Кітаем або развіваць маштабныя праекты па ЗПГ», - кажа ён.

Гэтыя меры таксама паўплываюць на заходнія кампаніі - такія як ExxonMobil з ЗША, BP і Royal Dutch Shell з Еўропы. Яны ўклалі значныя сродкі і маюць вялікія планы па развіцці бізнесу ў Расеі.

Што тычыцца іранскіх санкцый, еўрапейскія і іншыя кампаніі таксама павінны будуць іх прытрымлівацца для таго, каб прынятыя меры аказаліся эфектыўнымі. Аднак так як усе вядучыя прадпрыемствы ў сферы нафтавага сэрвісу - такія як Schlumberger, Halliburton and Baker Hughes - альбо грунтуюцца ў ЗША, альбо маюць у Амерыцы буйныя прадстаўніцтвы, Вашынгтон зможа на іх паўплываць.

Фота: Bloomberg