Літва дамаглася зніжэння кошту на расейскі газ на 20%

Газпрам пагадзіўся знізіць кошт на газ з умовай адклікання пазову Літвы з-за несправядлівых тарыфаў.

Пра гэта заявіў у інтэрв'ю нацыянальнаму радыё прэм'ер-міністр Альгірдас Буткявічус. Паводле яго слоў, новы коштавы тарыф пачне дзейнічаць з 1 ліпеня, піша Прайм.

"Ідуць апошнія падлікі і ўдакладненні на аснове пагаднення, падпісанага кампаніяй Летувас дуёс з Газпрамам аб зніжэнні кошту. Устаноўлены тарыф павінна будзе прааналізаваць і зацвердзіць Дзяржкамісія па коштах і кантролю ў сферы энергетыкі", - паведаміў Буткявічус.

Кіраўнік урада адзначыў, што падпісанае на мінулым тыдні пагадненне, якое вызначае асноўныя прынцыпы коштаўтварэння ў рамках доўгатэрміновага кантракту на пастаўку прыроднага газу да канца 2016 года, не пацягнула за сабой ніякіх зменаў у пазіцыі Вільні па пазове да Газпрама ў Стакгольмскім арбітражы. "На сённяшні дзень у нас няма ніякай інфармацыі аб тым, калі гэта пытанне магло б разглядацца арбітражам", - сказаў Буткявічус. Ён выказаў здагадку, што гэта можа адбыцца восенню. "Аднак магу ўсіх супакоіць: наша пазіцыя застаецца нязменнай", - адзначыў прэм'ер.

Лічачы ранейшы кошт (каля $500 за 1 тыс. кубаметраў) расейскай газавай сыравіны несправядлівым, літоўскі ўрад звярнуўся ў Стакгольмскі арбітраж з пазовам да Газпрама, у якім паказаў, што за пастаўлены газ пераплачана 4,5 млрд. літаў (1,3 млрд. еўра). Па паведамленнях СМІ, Газпрам пагадзіўся знізіць кошт на 20% з умовай адклікання пазову.

Нагадаем, 8 траўня кампанія Lietuvos dujos паведаміла пра падпісанне пагаднення з Газпрамам аб зніжэнні кошту на расейскі прыродны газ. Пры гэтым Lietuvos dujos не ўдакладніла памер прадстаўленай зніжкі.