Сальда знешняга гандлю паслугамі скарацілася ў тры разы

Сальда знешняга гандлю паслугамі ў сакавіку скарацілася да 79,5 млн. USD c 210,8 млн. USD у лютым.

Па дадзеных Нацыянальнага банка РБ, у сакавіку экспарт тавараў у коштах ФАБ вырас у параўнанні з лютым на 17,2% і дасягнуў 3376 млн. USD. А імпарт тавараў вырас усяго на 10,1%, склаўшы 3220,9 млн. USD. Дзякуючы апераджальнаму росту экспарту, сальда ў знешнім гандлю таварамі ў сакавіку склала 155,1 млн. USD супраць мінус 44,3 млн. USD у лютым, піша select.by.

Экспарт паслуг з Беларусі ў сакавіку вырас на 17,3% у параўнанні з лютым - да 592,9 млн. USD, але імпарт павялічыўся ў нашмат большай ступені: на 74,2%, дасягнуўшы 513,4 млн. USD. Чым тлумачыцца такі значны скачок імпарту паслуг, пакуль незразумела, можна адзначыць толькі тое, што ў сакавіку мінулага года падобнага росту імпарту не назіралася. Не выключана, што рост імпарту паслуг неяк звязаны з павелічэннем экспарту.

Як бы там ні было, у выніку сальда знешняга гандлю паслугамі ў сакавіку скарацілася да 79,5 млн. USD c 210,8 млн. USD у лютым.

Сумарны экспарт тавараў і паслуг у сакавіку вырас у параўнанні з лютым на 17,2%, дасягнуўшы 3968,9 млн. USD. Сумарны імпарт тавараў і паслуг павялічыўся амаль у такой жа ступені: на 15,9% - да 3734,3 млн. USD. А сальда гандлю таварамі і паслугамі ў сакавіку склала 234,6 млн. USD. У лютым дадзенае сальда раўнялася 166,5 млн. USD, а ў студзені - 276,6 млн. USD.

Такім чынам, нягледзячы на рост экспарту тавараў, у сакавіку істотнага паляпшэння стану знешняга гандлю Беларусі ў цэлым не адбылося.