Даходы Расеі ад прыватызацыі ўпадуць у восем разоў

У 2014 годзе Расея заробіць на прыватызацыі каля 26 млрд руб.

Раней планавалася, што даходы складуць каля 196 млрд руб. Пра гэта 19 траўня міністр фінансаў Расеі Антон Сілуанаў заявіў у эфіры тэлеканала "Россия 24", піша РБК.

На ўнутраным рынку Мінфін у 2014 годзе плануе заняць 435 млрд руб. замест 800 млрд руб., якія заяўляліся раней. Расея не будзе выходзіць на знешнія пазыковыя рынкі ў гэтым годзе. Пры гэтым з-за невыканання прыватызацыйных планаў урад можа прадаць частку свайго пакета ў "Раснафце" ў паскораным парадку, адзначыў міністр. Ён таксама дадаў, што ў верасні гэтага года ў праект бюджэту могуць быць унесеныя змяненні.

Прадстаўнік "Раснафты" паведаміў, што кампанія выканае любую дырэктыву галоўнага акцыянера. Цяпер "Раснафтагаз", які цалкам належыць Расмаёмасці, кантралюе 69,5%, у той час як брытанская BP - 19,75%.

Раней пра магчымае скарачэнне ўдзелу дзяржавы ў "Раснафце" заяўляў міністр эканамічнага развіцця Аляксей Улюкаеў. Ён дапусціў продаж дзяржпакету як цалкам, так і па частках. Па словах кіраўніка мэра, цяпер на рынку склалася нядрэнная кан'юнктура для падобнай здзелкі.

Першапачаткова скарачэнне дзяржудзелу ў "Раснафце" было запланавана на 2016 год. У красавіку Мінэканамразвіцця прапанавала прыватызаваць 19% акцый нафтавай кампаніі. Пасля продажу часткі акцый доля дзяржавы ў Раснафце павінна скласці 50% плюс адну акцыю. Па дадзеных Маскоўскай біржы, капіталізацыя "Раснафты" складае 2,41 трлн руб.