Украінскія палітыкі правядуць круглы стол у Данецку
4- 19.05.2014, 18:02
- 7,985
21 траўня ў Данецк прыедуць вядучыя ўкраінскія палітыкі.
Аб гэтым сказаў кіраўнік абласной дзяржаўнай адміністрацыі Сяргей Тарута, паведамляе мясцовы сайт 62.ua.
"21 траўня ў Данецку адбудзецца "круглы стол" нацыянальнага адзінства пад патранатам экс-прэзідэнтаў Украіны Леаніда Краўчука і Леаніда Кучмы, - заявіў ён.
- Нацыянальны круглы стол - гэта платформа для наўпроставага дыялогу ўпаўнаважаных дзеячаў міжнароднай супольнасці і ўкраінскіх уладаў усіх узроўняў з прадстаўнікамі арганізацый, уцягнутых у канфлікт. Мерапрыемства пройдзе пры кансультатыўнай падтрымцы АБСЕ".
Ён папрасіў усіх прадстаўнікоў грамадскіх і палітычных арганізацый усходу Украіны, прадстаўнікоў улады, а таксама ўдзельнікаў Жэнеўскага працэсу ўзяць удзел у "круглым стале".
"Ваш удзел стане важным сігналам падтрымкі ўкраінскага народу, які імкнецца да хутчэйшага развязання крызісу і дасягнення міру", - мяркуе Тарута.
Як вядома, пасля другога "круглага стала" нацыянальнага адзінства ў Харкаве Леанід Краўчук сказаў, што наступны такі сход, імаверна, адбудзецца 21 траўня ў Чаркасах. Раней, на першым "круглым стале" ў Кіеве, ён заявіў, што для правядзення такога мерапрыемства ў Данецку патрэбныя гарантыі бяспекі для ўдзельнікаў ад праваахоўных органаў.