Знік актывіст Юры Рубцоў

Жыхар Гомеля Юры Рубцоў, вызвалены з турмы на Акрэсціна ўвечары 21 траўня, дагэтуль не з'явіўся дома.

Пра гэта праваабаронцу Леаніду Судаленку паведаміла жонка Рубцова. Паводле яе слоў, пасля вызвалення муж патэлефанаваў і сказаў, што спрабуе неяк дабірацца да Гомеля і да раніцы будзе дома, піша gomelspring.org.

Цяпер журналісты спрабуюць даведацца, ці затрымліваўся Рубцоў пасля вызвалення. Рэч у тым, што следчы камітэт Савецкага раёна Менска праводзіць праверку паводле факту абразы суддзі Кірыла Палулеха, якому ён пасля суда кінуў «падонне».

Нагадаем, пасля традыцыйнага масавага мерапрыемства «Чарнобыльскі шлях», на якім Рубцоў быў у футболцы з надпісам «Лукашэнка, сыходзь!», актывіста затрымалі супрацоўнікі міліцыі.

28 красавіка суддзя суда Савецкага раёна Менска Кірыл Палулех вынес пастанову пакараць Рубцова арыштам на 25 дзён за «непадпарадкаванне законным патрабаванням службовай асобы» і «дробнае хуліганства», згодна з са складзенымі пратаколамі.