АБСЕ прызнала выбары ва Украіне дэмакратычнымі
4- 26.05.2014, 15:18
- 5,429
Арганізацыя адзначыла высокую яўку выбаршчыкаў і засведчыла, што выбары "адпавядаюць міжнародным абавязацельствам".
Выбары прэзідэнта ва Украіне 25 траўня адпавядаюць міжнародным абавязацельствам, а працэс галасавання і падліку галасоў былі празрыстымі, піша liga.net.
Пра гэта гаворыцца ў прэс-рэлізе, апублікаваным сёння на сайце арганізацыі.
"Датэрміновыя выбары прэзідэнта Украіны 25 траўня характарызаваліся высокай яўкай выбаршчыкаў і выразным намерам уладаў правесці сапраўдныя выбары, якія ў цэлым адпавядалі міжнародным абавязацельствам, з захаваннем асноўных свабод грамадзян на большай частцы краіны", - сказана ў дакуменце.
"Усё гэта адбывалася, нягледзячы на напружаную сітуацыю ў сферы бяспекі ў двух усходніх рэгіёнах, а таксама ўзмацненне спробаў з боку узброеных груп сарваць працэс у гэтых частках краіны", - адзначылі ў АБСЕ.
Арганізацыя канстатуе: ЦВК і іншыя выбарчыя камісіі "працавалі ў цэлым справядліва i калегіяльна, хоць узнікала некалькі пытанняў адносна празрыстасці іх працы напярэдадні дня галасавання, а некаторыя пастановы, якія прымаліся, магчыма, выходзілі за рамкі іх паўнамоцтваў".
Паведамляецца, што працэсы галасавання і падліку галасоў "былі празрыстымі і ў цэлым адпавядалі ўстаноўленым працэдурам".
"Працэс устанаўлення вынікаў галасавання на пачатковым этапе атрымаў менш станоўчую ацэнку назіральнікаў Міжнароднай місіі па назіранні за выбарамі, пераважна з-за тэхнічных праблем", - дадалі ў АБСЕ.
Арганізацыя адзначыла таксама сітуацыю на ўсходзе Украіны як тую, якая мае "істотныя негатыўныя наступствы для працэсу падрыхтоўкі да выбараў".
"Сур'ёзныя праблемы ў Данецкай і Луганскай абласцях тычыліся гвалтоўнага блакавання памяшканняў і закрыцця АВК групамі ўзброеных людзей, запалохванняў членаў камісій, у тым ліку выкрадання, пагроз жыццю, пранікненняў у прыватныя памяшканні, захопу абсталявання і выбарчых матэрыялаў, агнястрэльнага ранення даверанай асобы кандыдата", - гаворыцца ў паведамленні.
АБСЕ канстатуе, што гэтыя дзеянні былі накіраваныя на зрыў выбараў і пазбаўленне грамадзян іх асноватворнага права на свабоднае волевыяўленне.
Як паведамлялася, па стане на 13:54 (па мясцовым часе) панядзелка Цэнтральная выбарчая камісія апрацавала 75,08% пратаколаў на прэзідэнцкіх выбарах. На першым месцы знаходзіцца Пётр Парашэнка, за якога аддалі свае галасы 53,89% украінцаў.