На «Барысаўдрэве» ўзарвалі дзве трубы кацельні (Відэа)
4- 28.05.2014, 10:10
- 9,563
Работнікі МНС дэмантавалі 60-метровую і 30-метровую трубы кацельні на ААТ «Барысаўдрэў».
23 траўня спецыялісты выбухатэхнічнай службы Менскага абласнога ўпраўлення МНС выбухным спосабам дэмантавалі 60-метровую і 30-метровую трубы кацельні на ААТ «Барысаўдрэў».
Нягледзячы на тое, што візуальна складанага ў выбуху нічога няма, для правядзення гэтых работ спатрэбілася каля тыдня падрыхтоўкі, паведамляе прэс-служба МНС.
«Асаблівасць выбуху заключалася ў тым, што траекторыя падзення трубы праходзіла паміж шматкватэрным жылым домам і царквой, - распавёў начальнік выбухатэхнічнай службы Менскага абласнога ўпраўлення МНС Сяргей Мялюк. - Усё прайшло ў адпаведнасці з праектам вытворчасці выбуховых работ, дзе разлічваецца патрабаваны аб'ём выбухоўкі, зона палення трубы, напрамак валкі. 60-метровая труба ўпала па зададзенай траекторыі».
У гэты ж дзень работнікі выбухатэхнічнай службы ўзарвалі і другую 30-метровую трубу.
