Зніклую студэнтку з Брэста знайшлі ў Нясвіжы без памяці

21-гадовая брэстчанка Дар'я не пазнае нават бацькоў.

Студэнтка Брэсцкага тэхнічнага ўніверсітэта Дар'я знікла ў нядзелю ў Брэсце. Сама дзяўчына з Драгічынскага раёна, жыла ў інтэрнаце. І ў той дзень яна разам з сяброўкамі села піць чай, але вось цукру не аказалася, піша «Комсомольская правда в Беларуси».

- Я схаджу, - прапанавала Даша. І выйшла ў краму. Тэлефон пакінула на зарадцы. Больш дзяўчыну ніхто не бачыў.

Бацькі і сябры ў той жа дзень звярнуліся ў міліцыю.

- Яна вельмі станоўчая дзяўчына, вучылася на выдатна, ніякіх праблем і благіх кампаній не было, яна не магла ўзяць і так проста загуляць, - казалі ў міліцыі бацькі. - Яна нават у начным клубе ні разу не была, вучылася ўвесь час.

Да пошукаў далучыўся і пошукава-выратавальны атрад «Анёл». У інтэрнэце сталі распаўсюджваць арыентоўку на дзяўчыну.

Бацькі разам з цёткай Дашы выехалі на пошукі ў Брэст. З аднагрупнікамі дачкі яны абышлі ўсе наваколлі побач з універсітэтам, інтэрнатамі. Нават знайшлі свежае пахаванне і выклікалі міліцыю. Але гэта апынуўся труп сабакі.

А ў панядзелак Дашу, якая ляжала без прытомнасці, выявілі на абочыне дарогі ў Нясвіжскім раёне. Дзяўчына была без дакументаў і грошай, пры сабе былі толькі лісточкі з запісамі. На адным з іх было напісана: «Прачнулася на лаўцы ў парку. Моцны галаўны боль».

- Неабыякавыя людзі выклікалі хуткую дапамогу, - распавёў намеснік галоўнага лекара па медыцынскай частцы Нясвіжскай ЦРБ Барыс Харахорын. - Калі дзяўчына прыйшла ў прытомнасць, то не змагла назваць свайго імя, не памятала, як яна тут апынулася і што адбылося. Траўмаў і нейкіх слядоў гвалту ў яе няма. Мы правялі поўнае абследаванне. Праверылі, ці ёсць пухліны мозгу, нейкія анамаліі, таму што дзяўчына жалілася на моцны галаўны боль. Зрабілі кампутарную тамаграфію. А таксама ўзялі аналізы на наяўнасць алкаголю або наркатычных рэчываў. Адправілі ў лабараторыю і чакаем вынікаў.

- Так, бацькі ўжо з ёй сустрэліся. Гэта дакладна іх Даша. Праўда, яна іх не пазнала. Міліцыя вельмі хутка спрацавала, дзякуй ім, - распавёў стрыечны брат студэнткі Аляксей. - Як і чаму Даша апынулася там, незразумела. У яе і сваякоў ніякіх у Нясвіжы не было. Ніякіх праблем з памяццю ў яе не было ніколі.

Зараз Дашу перавезлі ў менскую клініку. Памяць да дзяўчыны пакуль не вярнулася.