Расея адмовіла Украіне ў назіральным палёце

Масква адмовіла Кіеву ў ажыццяўленні назіральнага палёту над расейскай тэрыторыяй.

Пра гэта на брыфінгу паведаміў дырэктар дэпартамента інфармацыйнай палітыкі МЗС Украіны Яўген Перабейніс, піша «Сегодня».

«Расея фактычна адмовіла Украіне ў правядзенні назіральнага палёту над расейскай тэрыторыяй па «Дамове адкрытага неба». Мы зыходзім з таго, што краіна, якая хоча пераканаць сваіх партнёраў у адсутнасці «нядобрых намераў», звычайна не шукае падстаў для ўскладнення або пераносу наглядальных мерапрыемстваў», - сказаў ён.

Па словах прадстаўніка ўкраінскага знешнепалітычнага ведамства, гэта ўжо не першы раз, калі Расея ажыццяўляе перашкоды для правядзення назіральнага палёту.

«У мінулы раз, калі Украіна звярнулася з запытам на правядзенне такога палёту, Расея дала дазвол, але паспрабавала перашкаджаць яго правядзенню, вылучыўшы «кабальныя» фінансавыя ўмовы. Украіна выканала гэтыя ўмовы і паспяхова правяла такі палёт у сакавіку, які пацвердзіў асцярогі ўкраінскага боку аб здзяйсненні РФ ваеннай дзейнасці паблізу межаў», - адзначыў дыпламат.