Мінчане змогуць атрымліваць рахункі праз электронную пошту

Менгарвыканкам абяцае такую магчымасць пад восень.

Ужо неўзабаве менчукі, якія звыклі аплачваць усе паслугі ЖКГ праз інтэрнэт, змогуць нават рахункі атрымліваць праз электронную пошту. У прыватнасці, на сайце www.komplat.by з'явіцца магчымасць падпісацца на бясплатную рассылку электронных паведамленняў аб суме платы за жыллёва-камунальныя паслугі - копій рахункаў у выглядзе PDF-файлаў. Новай паслугай змогуць скарыстацца толькі зарэгістраваныя карыстальнікі сайта. З'явіцца такі сэрвіс бліжэй да восені, піша агенцтва «Минск-новости».

- Акрамя рассылкі электронных паведамленняў жыхары сталіцы змогуць падпісацца і на SMS-паведамленні пра патрэбу аплаціць камунальныя паслугі, - заявіла начальніца аддзела маркетынгу КУП «Цэнтр інфармацыйных тэхналогій Менгарвыканкама» Марына Максіменка. - Але гэта ўжо будзе платная паслуга. Кошт складзе блізу 300 рублёў на месяц, якія ўключаць у рахунак. Падпісацца на SMS-паведамленні змогуць таксама толькі зарэгістраваныя карыстальнікі сайта www.komplat.by. Запрацуе паслуга ўвосень сёлета.

Мяркуецца, што на першапачатковым этапе SMS-напамінкі падпісчыкам будуць дасылаць двойчы на месяц, паведамляючы аб пачатку перыяду аплаты камунальных паслуг і аб яго заканчэнні. Пасля, магчыма, паслугу расшыраць. Пры гэтым, натуральна, паведамленні будуць тычыцца толькі сфэры ЖКГ».

На сёння сістэмай аўтаматызаваных разлікаў «Жилплат», якая інтэрактыўна прэзэнтаваная шматфункцыйным інтэрнэт-рэсурсам, ахоплена больш за 700 тысяч асабовых рахункаў у Менску і звыш 1,1 млн у краіне.