Расейская ракета «Пратон» магла ўпасці з-за сабатажу

Крушэнне ракеты адбылося з-за разбурэння вузла падшыпніка турбанасоснага агрэгату.

Міжведамасная камісія, якая займаецца расследаваннем крушэння ракеты-носьбіта "Пратон", разглядае наўмысны сабатаж у якасці прычыны аварыі.

Пра ход работы камісіі паведаміў намеснік гендырэктара ЦНІІмаш Аляксандр Данілюк. Ён адзначыў, што найбольш верагоднай версіяй крушэння ракеты зараз з'яўляецца разбурэнне вузла падшыпніка турбанасоснага агрэгату, піша РБК.

Крушэнне "Пратона", які быў запушчаны з самым магутным расейскім спадарожнікам сувязі "Экспрэс-АМ4Р", адбылося 16 траўня. Падчас трансляцыі запуску ракеты на сайце Дзяржаўнага касмічнага навукова-вытворчага цэнтра імя Хрунічава дыктар абвясціў аб узнікненні няштатнай сітуацыі. Пасля гэтага трансляцыя спынілася.

Збой адбыўся на 540-й секундзе пасля старту. На этапе працы трэцяй ступені ракеты-носьбіта ўзнікла няштатная сітуацыя, і касмічны апарат не быў выведзены на арбіту, паведамляла прэс-служба Раскосмаса.

Пасля катастрофы ракеты-носьбіта расейскія ўлады вырашылі прыпыніць пускі ракет "Пратон" да заканчэння працы аварыйнай камісіі. Крыніца РІА Новости заявіла, што запланаваны на 15 ліпеня пуск "Пратон-М" са спадарожнікам "Экспрэс-АМ6" перанесены на нявызначаны тэрмін.

Адразу пасля здарэння прадстаўнік Раскосмаса Алег Астапенка назваў у якасці прычыны аварыі падзенне ціску ў адным з рулявых рухавікоў трэцяй прыступкі носьбіта.

Страчаны спадарожнік "Экспрэс-АМ4Р" створаны еўрапейскай кампаніяй EADS Astrium па замове ФГУП "Касмічная сувязь" у рамках Федэральнай касмічнай праграмы Расеі на 2006-2015гг . Касмічны апарат масай прыблізна 5755 кг пабудаваны на базе платформы Eurostar Е3000 і абсталяваны 63 транспондзерамі С-, Кu-, Ка-, L-дыяпазону і дзесяццю антэнамі для забеспячэння ўстойлівага пакрыцця сувяззю ўсёй тэрыторыі Расеі і краін СНД.

"Экспрэс-АМ4Р" з'яўляўся самым магутным і высокатэхналагічным расейскім спадарожнікам сувязі. Ён павінен быў стаць трэцім касмічным апаратам серыі "Экспрэс", запушчаным у 2014 годзе. Спадарожнік каштаваў 150 млн еўра і быў застрахаваны ў "Інгасстраху" больш чым на 7,8 млрд руб.

Фота: РІА «Новости»