Маланка забіла мужчыну ў Столінскім раёне

Мужчына пасвіў кароў на пашы паблізу вёскі Турскае.

У сераду, 28 траўня, падчас навальніцы загінуў 41-гадовы жыхар вёскі Турскае і работнік мясцовага СВК, паведамляе «Медиа-Полесье».

Трагедыя адбылася каля 13.00. Як паведамілі ў Следчым камітэце, мужчына ў гэты час пасвіў кароў на пашы паблізу вёскі. Падчас дажджу ён схаваўся ў вагончыку, каб перачакаць навальніцу, у вагончык ударыла маланка - мужчына загінуў. Канчатковую прычыну смерці ўстановяць судмедэксперты.

У загінулага дзве дачкі.

Ратавальнікі рэкамендуюць падчас навальніцы па магчымасці не выходзіць на вуліцу, не адпачываць паблізу вадаёмаў, не купацца, не перамяшчацца на роварах і матацыклах. Пазбягайце адкрытай мясцовасці. У полі хавайцеся ў любым паглыбленні: канаве, лагчынцы або на самым нізкім месцы поля. Не ляжыце на мокрай зямлі падчас навальніцы.

Удар маланкі небяспечны для чалавека і калі яна б'е ў бліжэйшыя прадметы. Таму не дакранайцеся да мокрага, жалезнага, электрычнага: у такія рэчы маланка б'е часцей за ўсё. Падчас навальніцы адключыце мабільны тэлефон.