Тэрарысты патлумачылі, навошта выкралі беларуса ў Данецку
33- 3.05.2014, 7:39
- 41,248
Адказнасць за выкраданне намесніка Парубія ўзяла на сябе «Руская праваслаўная армія».
Пра гэта тэрарысты заявілі расейскаму тэлеканалу LifeNews.
«Адказнасць за захоп каардынатара антытэрарыстычнай аперацыі ў Данбасе бярэ на сябе «Руская праваслаўная армія». Яго лёс будзе вырашаны бліжэйшымі днямі. Магчыма, яго абмяняем на нашых таварышаў, якія знаходзяцца ў палоне», заявіў адзін з іх.
Нагадаем, учора ў Данецку баевікі затрымалі і вывезлі ў невядомым кірунку кіраўніка Самаабароны вобласці Аляксандра Якубовіча. Са слоў відавочцаў, ён быў схоплены каля 15:30 паводле мясцовага часу. У затрыманні бралі ўдзел амаль 12 чалавек, узброеных пісталетамі расейскай вытворчасці. Пасля кіраўнік быў вывезены ў невядомым кірунку на мікрааўтобусе «Фольксваген».
Аляксандр Якубовіч - саракагадовы адстаўны міліцыянт, які пераехаў у Данецк з Берасця. У час супрацьстаяння на Майдане ён знаходзіўся ў Кіеве і камандаваў 28-ай сотняй Самаабароны. Зараз беларус вярнуўся ў Данецк, дзе бярэ ўдзел у праўкраінскіх акцыях, ён таксама з'яўляецца адным з дарадцаў сакратара Рады бяспекі Украіны Андрэя Парубія.