Добра жыве той, хто шмат працуе? Толькі не ў Беларусі

У якіх краінах узровень жыцця насельніцтва вышэй: там, дзе больш працуюць ці там, дзе больш адпачываюць?

Гэта паспрабавалі высветліць у кампаніі ГК Forex Club. І вось што атрымалася.

У сярэднім колькасць святочных дзён у большасці краін свету вагаецца ад 10 да 14. Паводле звестак ЮНЕСКА, сярэднестатыстычная краіна адзначае святы 12,2 дня, піша «Інтэрфакс».

Лідарамі ў ліку афіцыйных святочных выходных з'яўляюцца Ізраіль і Шры-Ланка, іх там 25 і 24, адпаведна. У Бразіліі 21, у Кітаі 16, Японіі 15, у Паўднёвай Карэі 13. Ад 10 да 13 дзён адпачываюць жыхары Заходняй Еўропы, а ў Вялікабрытаніі і на Кубе ўсяго 8 святочных выхадных. Расейцы адпачываюць 12 дзён, а беларусы - усяго 9.

Для даследавання кампанія ўзяла наступныя краіны: Ізраіль, Кітай, Японію, Расею, Нямеччыну, Беларусь і Вялікабрытанію (крытэрый адбору краін аўтарка даследавання не тлумачыць).

У якасці параметраў ацэнкі браліся наступныя эканамічныя параметры: ВУП на душу насельніцтва (паводле звестак Сусветнага Банка), сярэдняя заработная плата і кошт знакамітага бутэрброда Біг Мак з McDonald's.

Як відаць з табліцы, дадатковыя выходныя пайшлі на карысць ізраільскаму ВУП, які займае далёка не самае апошняе месца. Затое ў Беларусі, нягледзячы на сціплую колькасць святочных выходных, гэты паказчык крыху вышэйшы за кітайскі. Тое ж самае можна сказаць і пра памер сярэдняй заработнай платы. Толькі Велікабрытанія ўпісваецца ў першапачатковую гіпотэзу «мала адпачываем, шмат зарабляем».

Для ацэнкі жа рэальнага прыбытку быў узяты кошт Біг Мака і палічана колькасць амерыканскіх бутэрбродаў, якую можна купіць за сярэднюю зарплату.

Па колькасці набытых бутэрбродаў рэйтынг краін выглядае наступным чынам: Японія, Вялікабрытанія, Нямеччына, Ізраіль, Расея, Кітай, Беларусь.

«У гэтым выпадку здагадка аб тым, што добра жыве той, хто шмат працуе, не вытрымлівае ніякай крытыкі. Японія, лік выходных у якой перавышае сярэдняе значэнне, разлічанае ЮНЕСКА, паводле рэальных прыбыткаў насельніцтва абыходзіць нават Вялікабрытанію - рэкардсмена па ліку працоўных дзён, не кажучы ўжо пра працавітую Рэспубліку Беларусь. Калі паглядзець агулам, то развітыя краіны (Японія, Вялікабрытанія, Нямеччына), паводле ўзроўню жыцця абыходзяць тыя, што развіваюцца. І гэта цалкам лагічна, паколькі прадукцыйнасць працы там вышэй. А значыць, яны цалкам могуць дазволіць сабе дадатковы выходны. Бо трэба ўмець не толькі працаваць, але і адпачываць», - адзначае аўтарка даследавання Ірына Рогава.