The Wall Street Journal: ЗША павінны дапамагчы Кіеву нанесці ўдар па Пуціну

Акрамя ўвядзення санкцый супраць Расеі, Вашынгтон павінен умацаваць украінскую эканоміку.

Прывязка грыўні да больш стабільнай валюты бязмерна дапаможа Кіеву і нанясе ўдар па Пуціну. Гэта дапаможа краіне вытрымаць спробу захопу з боку Пуціна. Так сцвярджае сенатар-рэспубліканец Марка Рубіо ў артыкуле, які публікуе The Wall Street Journal, перадае Цензор.НЕТ.

"Адзін са спосабаў павысіць шанцы на паспяховую будучыню Украіны - гэта ўмацаванне яе нацыянальнай валюты, паколькі для эканамічнага росту патрабуецца стабільная грашовая падстава, - гаворыцца ў артыкуле. - Нават пры тым, у 2014 годзе курс расейскага рубля знізіўся ў адносінах да даляра амаль на 9%, Пуціна цешыць думка, што з грыўняй ўсё ідзе яшчэ горш: са студзеня яна абвалілася ў адносінах да даляра на 35%. Слабасць валюты - частка яго плана паставіць Украіну на калені".

Аднак Амерыка і яе еўрапейскія саюзнікі здольныя зблытаць карты расейскаму прэзідэнту, упэўнены амерыканскі заканадавец: "Мы павінны спрыяць стварэнню ўкраінскага валютнага савета - гэта інстытуцыянальны механізм, які прывязвае нацыянальную валюту да больш стабільнай замежнай валюты. У межах валютнага савета грыўна будзе канвертавацца ў даляры і еўра па фіксаваным курсе і падмацоўвацца за кошт украінскіх запасаў цвёрдай валюты. МВФ папоўніць гэтыя запасы з дапамогай спецыяльнай дамовы пра пазыку".

На думку аўтара артыкула, гэты крок станоўча адаб'ецца на ўсёй украінскай эканоміцы: замежныя інвестары змогуць быць упэўненыя, што грыўна не вырачаная на пагібель, а ўкраінцы будуць ведаць, што Пуцін не ў стане абясцэніць іх зберажэнні.

"Не менш важны той факт, што Масква імгненна сутыкнецца з рэальнасцю: украінская валюта раптам стала надзейней, чым яе ўласная", - паказвае сенатар. "Крэдытна-грашовая палітыка не з'яўляецца моцным бокам Расеі ў міжнародных стасунках, таму ЗША і Еўропа павінны стратэгічна выкарыстоўваць сваю перавагу для нанясення шкоды ўразліваму суперніку", - лічыць Рубіо.

"Умацаванне нацыянальнай валюты і ўстанаўленне спарадкаванага манетарнага рэжыму стане магутным сігналам падтрымкі Кіеву ў той момант, калі новы ўрад спрабуе прынесці ў краіну эканамічныя рэформы і дэмакратычныя інстытуты. Важней за ўсё тое, што ўстанаўленне валютнага савета дапаможа пазбегнуць траты сродкаў МВФ і іншай міжнароднай дапамогі, куды ўваходзяць і даляры амерыканскіх падаткаплацельшчыкаў, на нестабільную эканоміку", - мяркуе Рубіо.