Масквічы прыйдуць на акцыю ў гадавіну разгону Балотнай

Акцыі, прысвечаныя падзеям 6 траўня 2012 года на Балотнай плошчы ў Маскве, праходзяць у аўторак па ўсёй Расеі.

Паведамляецца пра мерапрыемствы ў Екацярынбургу, Санкт-Пецярбургу, Новасібірску, Калінінградзе і Маскве. Іх удзельнікі збіраюцца выступіць супраць крымінальнага пераследу абвінавачаных па "балотнай справе", а таксама за свабоду для тых, хто ўжо прысуджаны да турэмных тэрмінаў, перадае BBC.

Правядзенне мітынгу на Балотнай плошчы - там, дзе напярэдадні інаўгурацыі Уладзіміра Пуціна на трэці тэрмін праходзіў Марш мільёнаў, які скончыўся раненнямі і арыштамі сотняў чалавек - маскоўскія ўлады не ўзгаднілі. Тым не менш, увечары людзі ўсё роўна збіраюцца прыйсці на плошчу.

"На жаль, мэрыя Масквы адмовілася ўзгадніць мітынг на Балотнай плошчы, спасылаючыся на падрыхтоўку да параду", - распавёў актывіст руху "Салідарнасць" Пётр Царкоў.

Намеснік мэра Масквы паскардзіўся на тое, што пасля мінулых акцый дэманстранты не прыбіралі плошчу за сабой, і спаслаўся на неабходнасць падрыхтоўкі да рэпетыцыі ваеннага параду, прызначанай на 7 траўня. Між тым, у 2013 і 2012 годзе ўлады ўзгаднялі правядзенне акцый 6 траўня менавіта на Балотнай плошчы.

"Нам прапаноўвалася альтэрнатыўная пляцоўка - праспект Сахарава, але паколькі 6 траўня нам прынцыпова важна, для нас гэта сімвалічна - выйсці менавіта на Балотную плошчу, гэтая пляцоўка нас не задаволіла, - тлумачыць Пётр Царкоў. - Узгодненай акцыі сёння не будзе, і гэтая інфармацыя была даведзена да масквічоў. Тым не менш, многія людзі збіраюцца ўсё роўна прыйсці на Балотную плошчу, і ў гэтым выпадку мы вымушаны папярэдзіць людзей пра тое, што на жаль, магчымыя затрыманні. Акцыя не ўзгодненая, таму Балотная плошча, хутчэй за ўсё будзе ачэпленая, і паліцыя можа праводзіць сёння затрыманні".

Мэрыя заявіла з раніцы, што няўзгодненая акцыя не будзе дапушчаная, не ўдакладніўшы, ці будзе паліцыя разганяць людзей, якія гуляюць.

Адмова расейскіх уладаў узгадняць акцыю на Балотнай плошчы ўжо выклікала заклапочанасць міжнароднай праваабарончай арганізацыі Amnesty International.

"Расейскія ўлады душаць свабоду выказвання меркаванняў і душаць свабоду сходаў. Жорсткая рэакцыя на нядаўнюю чараду мірных дэманстрацый у Маскве паказвае, наколькі цяжкай і небяспечнай стала арганізацыя акцый пратэсту і ўдзел у іх", - прыводзяцца словы кіраўніка расейскага прадстаўніцтва Amnesty International Сяргея Нікіціна на сайце арганізацыі.

"Дэманстрацыя на Балотнай 6 траўня 2012 года і суды над яе ўдзельнікамі, якія рушылі ўслед, сталі сімвалам пратэсту і рэпрэсій. Забарона на правядзенне любых сходаў на Балотнай у другую гадавіну падзей зноў паказала цвёрды намер урада Пуціна выкараніць усе бачныя прыкметы нязгоды", - заявіў Нікіцін.