Амністыя закране больш за 10 тысяч асуджаных

Па папярэдніх падліках, амністыя цяперашняга года закране больш за 10 тыс. асуджаных у Беларусі.

Пра гэта паведамілі БелТА ў МУС.

Мяркуецца, што з папраўчых устаноў закрытага тыпу будзе вызвалена каля 2,1 тыс. чалавек, з папраўчых устаноў адкрытага тыпу - каля 630. Тэрмін пакарання будзе скарочаны на год прыкладна 7 тыс. асуджаных у папраўчых установах закрытага і 900 асуджаным - адкрытага тыпу.

Згодна з законапраектам "Аб амністыі ў сувязі з 70-годдзем вызвалення Беларусі ад нямецка-фашысцкіх захопнікаў" прадугледжваецца вызваліць ад крымінальнай адказнасці і ўсіх відаў крымінальных пакаранняў так званую льготную катэгорыю асоб (непаўналетніх, цяжарных, жанчын і адзінокіх мужчын, якія маюць на ўтрыманні непаўналетніх, пенсіянераў, інвалідаў, хворых на актыўную форму туберкулёзу, ВІЧ-інфікаваных, ветэранаў баявых дзеянняў, грамадзян, якія пацярпелі ад катастрофы на Чарнобыльскай АЭС і інш), якія ўчынілі злачынствы, якія не адносяцца да катэгорыі цяжкіх і асабліва цяжкіх. Таксама ад пакарання ў выглядзе арышту, абмежавання або пазбаўлення волі будуць вызваленыя асобы, якія адбываюць пакаранне за злачынствы, якія не ўяўляюць вялікай грамадскай небяспекі: асуджаныя да арышту - незалежна ад тэрміну адбытага пакарання; за менш цяжкія злачынствы - пры адбыцці не менш чвэрці тэрміну; за некаторыя цяжкія і асабліва цяжкія злачынствы супраць уласнасці і парадку ажыццяўлення эканамічнай дзейнасці (прысваенне, растрата, крадзеж шляхам выкарыстання кампутарнай тэхнікі, ухіленне ад выплаты сум падаткаў, збораў, незаконная прадпрымальніцкая дзейнасць) - пры адбыцці не менш трэці тэрміну пакарання (за выключэннем тых, хто здзейсніў злачынствы ў складзе арганізаванай групы); за іншыя злачынствы - калі да заканчэння тэрміну адбывання пакарання засталося менш за год. Ужо традыцыйна адной з галоўных умоў амністыі, з'яўляецца тое, што яна распаўсюджваецца толькі на асоб, якія цалкам кампенсавалі шкоду. Як адзначылі ў МУС, гэта паслужыць таму, што асуджаныя будуць імкнуцца хутчэй аддаць свае даўгі дзяржаве і грамадзянам.

Таксама ў законапраекце пашыраная катэгорыя асоб, на якіх амністыя не распаўсюджваецца. Яна не закране тых, хто ўчыніў забойства альбо наўмыснае прычыненне цяжкага цялеснага пашкоджання, што пацягнула смерць (арт.139 , ч.3 арт.147 Крымінальнага кодэкса Беларусі); злачынствы, звязаныя з незаконным абаротам наркатычных сродкаў (ч.3 і ч.4 арт. 328 Крымінальнага кодэкса). Пад амністыю не трапяць кіроўцы, якія кіравалі транспартам у стане алкагольнага ап'янення (арт.317-1 КК), а таксама якія парушылі ПДР у стане алкагольнага ап'янення, што пацягнула смерць чалавека (ч.4 і ч.5 арт.317 КК). Не будуць вызваленыя і тыя, хто здзейсніў злачынства супраць палавой недатыкальнасці або палавой свабоды ў дачыненні да непаўналетніх.

На амністыю не могуць разлічваць злосныя парушальнікі ўстаноўленага парадку адбывання пакарання; асабліва небяспечныя рэцыдывісты; асуджаныя да пажыццёвага зняволення; тыя, хто не кампенсавалі шкоду ад злачынства, а таксама расходы на ўтрыманне дзяцей, якія знаходзяцца на дзяржаўным забеспячэнні, або запазычанасці па аліментах.

Як раней паведамлялася, падчас амністыі 2012 года палітвязні не змаглі выйсці на волю.