Нацбанк абмежаваў адсоткавыя стаўкі па крэдытах для юрыдычных асоб
- 7.05.2014, 12:32
- 6,731
Нацыянальны банк Беларусі абмежаваў адсоткавыя стаўкі па крэдытах для юрыдычных асоб - рэзідэнтаў рэспублікі ў нацыянальнай валюце.
Адпаведнае рашэнне замацавана ў пастанове галоўнага рэгулятара №260 ад 22 красавіка 2014 года, якая сёння афіцыйна апублікаваная на Нацыянальным прававым інтэрнэт-партале, паведамляе БелТА.
Згодна з дакументам, максімальны памер адсоткавых ставак па крэдытаванні юрыдычных асоб у нацыянальнай валюце не павінен перавышаць на дзень заключэння крэдытнай дамовы сярэднюю адсоткавую стаўку па новых крэдытах у беларускіх рублях за апошні справаздачны месяц (без уліку крэдытаў, якія прадстаўляюцца на льготных умовах у рашэннях Прэзідэнта і ўрада Беларусі).
Як раней тлумачылі ў НББ, гэты дакумент распрацаваны ў мэтах «далейшага зніжэння банкамі адсоткавых ставак па крэдытах для юрыдычных асоб і павышэння даступнасці крэдытных рэсурсаў для рэальнага сектара эканомікі».
Дакумент уступае ў сілу пасля яго афіцыйнага апублікавання і дзейнічае да 1 студзеня 2015 года.