Перамога апазіцыі ў Тайландзе: суд абавязаў прэм'ера сысці ў адстаўку

Выконваючая абавязкі прэм'ер-міністра Тайланда Йінглак Чынават павінна пакінуць сваю пасаду.

Рашэнне аб яе адстаўцы прыняў у сераду, 7 траўня, Канстытуцыйны суд краіны, паведамляе BBC. Яна прызнаная вінаватай у перавышэнні службовых паўнамоцтваў.

«Паўнамоцтвы прэм'ер-міністра спыненыя, Йінглак Чынават не можа больш заставацца на сваёй пасадзе», - гаворыцца ў заяве суда.

Кіраўнік урада краіны паўстала перад судом у аўторак. Скаргу супраць яе вылучыла група парламентароў з апазіцыйнай партыі. Сенатары, якія падалі пазоў, сцвярджаюць, што Йінглак Чынават незаконна адправіла ў адстаўку кіраўніка Савета нацыянальнай бяспекі Тайланда Тавіла Пліенсры. На іх думку, прычынай прынятага рашэння стала асабістая зацікаўленасць в.а. прэм'ер-міністра.

У лістападзе 2011 года Йінглак Чынават узначаліла часовы ўрад Тайланда. Пад ціскам апазіцыі ў снежні 2013 года яна распусціла парламент і пагадзілася правесці датэрміновыя выбары. Аднак вынікі галасавання, якое прайшло ў лютым, былі адмененыя Канстытуцыйным судом краіны.

Апазіцыя дамагаецца адстаўкі прэм'ер-міністра Йінглак Чынават з лістапада 2013 года. Менавіта тады ў краіне пачаліся масавыя пратэсты. Дэманстранты патрабуюць стварэння ў краіне «народнага савета», які будзе выконваць функцыі ўрада. У сакавіку ўлады Тайланда адмянілі рэжым надзвычайнага становішча, які быў уведзены 22 студзеня 2014 года.