Узброеныя баевікі ўварваліся ў абласную пракуратуру ў Луганску
3- 7.05.2014, 16:25
- 21,438
Супрацоўнікаў пракуратуры вывелі з будынка.
Унутры засталіся кіраўнікі абласной пракуратуры. Пра гэта паведаміла журналістам прэс-сакратарка ўстановы Марына Брагіна, піша мясцовае выданне cxid.info.
"Унутры будынка знаходзіцца кіраўніцтва пракуратуры і людзі з аўтаматамі. Патрабаванні захопнікаў прэс-службе пакуль невядомыя. Усіх супрацоўнікаў пракуратуры, акрамя кіраўнікоў, вывелі. Яны стаяць ля будынка", - сказала яна.
Уваход ахоўваюць паводле розных звестак ад 7 да 15 чалавек з аўтаматамі.
Пракурор Луганскай вобласці Сяргей Стось адмовіўся пакінуць памяшканне пракуратуры. Адначасова ў міліцыі паведамілі, што з будынка выйшлі ўсе супрацоўнікі, якім было загадана не вяртацца туды да 25 траўня, піша УНП.
Нагадаем, 2 траўня прэс-сакратарка пракуратуры Луганскай вобласці Марына Брагіна паведамляла, што памяшканне аблпракуратуры было вызвалена, дзякуючы перамовам паміж прадстаўнікамі ўлады і людзьмі, якія захапілі будынак. Будынкі абласной адміністрацыі і аблпракуратуры раней былі захопленыя 29 красавіка ў Луганску.