На мяжы з Украінай - 38 тысяч расейскіх вайскоўцаў
11- 7.05.2014, 20:03
- 12,475
Расея не збіраецца адводзіць войскі ад межаў з Украінай.
Пра гэта заявіў кіраўнік Цэнтра вайскова-палітычных даследаванняў Дзмітрый Тымчук на сваёй на сваёй старонцы ў сацыяльнай сетцы «Фэйсбук», каментуючы сённяшнюю заяву Уладзіміра Пуціна аб адводзе расейскіх войскаў.
«З нагоды заявы У.Пуціна аб адводзе расейскіх войскаў ад мяжы РФ з Украінай. Паводле аператыўных звестак групы «Інфармацыйны Супраціў», на 17 гадзін 7 траўня групоўка расейскіх войскаў ля межаў з Украінай не змяніла колькасці ў параўнанні з сітуацыяй на 1 траўня», - напісаў ён.
«Мы не фіксуем адводу расейскіх войскаў як з 50-км, так з двухсоткіламетровай зоны ўздоўж мяжы РФ з Украінай. Таксама на працягу апошняга тыдня мы не назіраем і прыбыцця новых частак і падраздзяленняў. Колькасць расейскіх войскаў у двухсоткіламетровай зоне ад усходняй мяжы Украіны складае блізу 38 тысяч чалавек», - распавёў экспэрт.
У паўднёва-ўсходніх абласцях Украіны з пачатку сакавіка праходзяць справакаваныя Расеяй акцыі сепаратыстаў. Эпіцэнтрамі хваляванняў сталі абласныя цэнтры і шэраг буйных гарадоў, адміністрацыйныя будынкі, у якія перыядычна бяруць пад кантроль дыверсанты і баевікі. СБУ атрымала довады, што імі кіруюць прадстаўнікі расейскіх спецслужбаў і ГРУ.