Лукашэнка: Не трэба бегчы ў абменнікі

Кіраўнік прызнаўся, што яму прапануюць правесці дэвальвацыю на 20%.

Пра гэта Лукашэнка сказаў, адказваючы на пытанні журналістаў, перадае БелТА.

"У чарговы раз паўтарыў тое, што заўсёды казаў. Дэвальвацыі, абвалы, войны, канфлікты - усё залежыць толькі ад нас. Калі вы гэтага не захочаце, паверце, гэтага ніколі ў Беларусі не адбудзецца. Я вам гарантую. Калі вы гэтага хочаце, так што ж я магу зрабіць? Вы гэтага хочаце, я ваш слуга. Але ніякай дэвальвацыі мы не плануем", - падкрэсліў ён.

Разам з тым, па словах кіраўніка, перыядычна яму прапануюць правесці разавую дэвальвацыю на 10%, 20%.

"Камусьці добра - экспарцёрам. Але гэта глыток паветра на нейкае імгненне. З іншага боку (ёсць жа іншы бок), гэта ўдарыць па ўсяму насельніцтву. Гэта ж усплёск коштаў, прыстойны ўсплёск коштаў. І ён потым іншым канцом ударыць па экспарцёрам. Нам гэта трэба? Нам гэта не трэба", - сказаў Лукашэнка.

Як нагадаў кіраўнік, у Беларусі і так з пачатку года адбылася плыўная дэвальвацыя нацыянальнай валюты прыкладна на 7-8%. Улада не прымае спецыяльных мер для ўтрымання курсу беларускага рубля.

"Мы ж яго не трымаем ссінелымі рукамі. Навошта ж павялічваць кошт на валюту, калі такой неабходнасці сёння няма", - канстатаваў ён.

Кіраўнік лічыць, што да канца года можа працягнуцца плыўная дэвальвацыя беларускага рубля яшчэ на 5-7%. Нічога страшнага ў гэтым ён не бачыць.

"Нічога страшнага не адбудзецца, і людзі да гэтага прывыкнуць, і мы вас да гэтага падвядзем праз заработную плату", - сказаў ён, яшчэ раз падкрэсліўшы, што рэзкіх змяненняў курсу не адбудзецца.

На думку Лукашэнкі, чуткі пра магчымую дэвальвацыю падагравае ў грамадстве пэўная катэгорыя людзей.

"Чаму некаторыя, хто дрэнна размаўляе на рускай і беларускай мове, пачынаюць падбухторваць? Для іх, чым горш у краіне, тым лепш. Яны так і не зрабілі выснову з украінскіх падзей. Яны не разумеюць, што мала не падасца і ім, калі, не дай Бог, дэстабілізуецца абстаноўка. Таму мы не плануем ніякай дэвальвацыі".

Лукашэнка нагадаў, што ў мінулы раз да таго, калі адбылася разавая дэвальвацыя, ён таксама папярэджваў грамадзян не скупляць валюту і не правакаваць зніжэнне курсу. На яго думку, з тых падзей насельніцтву таксама трэба атрымаць урокі.

"У нас нармальныя перспектывы, але трэба здрыгануцца самім, усяму народу і шукаць шчасце тут. Раю вам: не трэба бегчы ў абменнікі", - сказаў ён.