Зборная Францыі становіцца фаварытам ЧС у футболе

Зборная Францыі пад кіраўніцтвам Дыдзье Дэшама ніколі не была ў такім добрым стане, як учорашнім вечарам у бразільскім Сальвадоры.

Нават 8 гадоў таму на палях Германіі, калі каманда дайшла да фіналу чэмпіянату свету. Не пабаімся сказаць, што і ў 1998, на хатнім мундыялі, французы не выглядалі настолькі вольна, піша БелТА.

Што зняло напружанне з французскай каманды? Нагадаем, што на мінулым ЧС зборная не выйшла з групы. Каманда аб'яўляла байкот трэнеру Раймону Даменэку, які, мяркуючы па публікацыях у французскіх СМІ, раіўся з астраномамі перад тым, як вызначыць склад. Францыя-2014 не мае нічога агульнага з той камандай. Францыя Дыдзье Дэшама больш падобная на Францыю Эмэ Жаке, каманду, якая 16 гадоў таму здабыла сваё адзінае чэмпіёнства. Дарэчы, капітанам той зборнай быў Дэшам.

У матчы са Швейцарыяй падапечныя Дэшама рабілі, што ўздумаецца: забівалі на любы густ, урываліся ў свабодныя зоны і нават маглі дазволіць не забіваць з пенальці ці прапускаць 2 мячы на апошніх хвілінах. Калі ў асноўны час ты забіваеш 5 - можна зрабіць перадышку.

У чым сіла Францыі? Перш за ўсё, паўабарона. Лінія з Кабая, Мацюідзі, Сісока і Вальбуэна выглядае гэтак жа эфектна, як лінія Зыдан-Дэшам-Пеці ў 1998-м. Кабай, Сісока і Мацюідзі ў мінулым сезоне ў розны час гулялі за адны клубы («ПСЖ», «Ньюкасл»), што паспрыяла згулянасці, якую ў Сальвадоры на сабе адчулі швейцарцы.

У лініі атакі ёсць Аліўе Жыру, форвард, які ўмее паставіць корпус і згуляць на другім паверсе (так і быў забіты першы гол у вароты Бенальё), і калі ў «Арсенале» Жыру правёў неадназначны сезон, то за зборную гуляе, як у лепшыя гады ў « Манпелье ».

А калі «выпадзе» Жыру, ёсць Карым Бензема, які пакуль, разам з галандцам Ван Персі, - лепшы нападнік турніру.

Адзіная лінія, у якой могуць узнікнуць пытанні і якая перашкодзіць Францыі дабрацца да позніх стадый турніру - лінія абароны. Так, там сапраўды няма Дэсаі і Саньёля, як было ў «залатым» 1998-м, але там гулец мадрыдскага «Рэала» Варай з рассякаючым першым пасам, а прэсінг з флангаў забяспечваюць Эвра («Манчэстэр Юнайтэд») і Дэбюшы.

З Гандурасам і Швейцарыяй Францыя разабралася гуляючы, прадэманстраваўшы і згулянасць, і запас, які ўласцівы камандзе. Такой формы на бягучым ЧС не паказала ні Германія, ні Бразілія з Аргенцінай. На гэтай стадыі толькі Галандыя бачыцца канкурэнтам каманды Дэшама.

Аднак, гэта чэмпіянат свету - форму каманда можа набраць падчас турніру і, як казаў трэнер бразільцаў Луіс Фэліпэ Скалары: «Чэмпіянат гэта толькі 7 матчаў, у якіх трэба перамагчы». І пакуль Францыя да гэтых перамог нашмат бліжэй, чым гаспадары мундыяля.

«Перамагчы з лікам 5:2 - гэта нешта неверагоднае. Мець шэсць ачкоў пасля стартавых двух матчаў - ідэальны вынік», - сказаў Дыдзье Дэшам пасля матчу.