У Таліне «світа» Гаварухіна збіла ўкраінскую актывістку

Сябры расейскага рэжысёра Станіслава Гаварухіна напалі на ўкраінскую актывістку Валянціну Бардакову і яе мужа за пытанне пра ліст Пуціну.

Пра гэта ў «Фэйсбуку» напісаў украінскі піяніст Павел Гінтаў.

«Толькі што патэлефанавала з Таліна Валянціна Бардакова і распавяла зусім дзікую гісторыю. Перш за ўсё, павінен сказаць, што Валя і яе муж Гена - выключна прыемныя, інтэлігентныя, душэўныя людзі. Пазнаёміўшыся з імі, немагчыма не адчуваць да іх сімпатыю і павагу.

Зараз яны ў Таліне. І вось што з імі здарылася. Вяртаючыся ўвечары ў гасцініцу, на адной з летніх пляцовак яны заўважылі кампанію людзей, у якой пазналі знакамітага рэжысёра і «падпісанта» ліста Пуціну Станіслава Гаварухіна. Валя ў Нью-Ёрку праславілася як пагроза «падпісантаў» - яна была арганізатарам акцый пратэсту супраць прыезду Гергіева і Співакова. Пазнаўшы Гаварухіна, яна падышла да яго, павіталася і ветліва спытала, навошта ён падпісаў вядомы ліст. Гаварухін не адказаў, але Валіна пытанне выклікала вельмі бурную рэакцыю ў ягонай світы. Завязалася слоўная сварка са стандартным наборам - «фашысты», «нікчэмнасць», «як вы можаце прыставаць да генія», «Крым заўсёды быў рускім» і г.д.

У нейкі момант разагрэтыя спрэчкай і спіртным расейцы вырашылі не словам, а справай даказаць сваю правату. Чалавек, у якім Валя пазнала вядомага акцёра Фёдара Дабранравава, схапіў Гену за горла, двое іншых павалілі яго на зямлю і пачалі збіваць. Валя паспрабавала ўмяшацца, тады дасталося і ёй: зламаны палец - вось кошт сустрэчы з дзеячамі культуры... »- напісаў музыка.

Ён дадаў, што тых, хто нападаў, было сямёра.

«Невядома, чым бы ўсё скончылася, калі б выпадковы мінак не выклікаў паліцыю. Паліцыя, зрэшты, мяркуючы па ўсім, усімі сіламі спрабуе пазбегнуць праблем са знакамітым расейскім госцем, якія могуць перарасці ў міжнародны скандал. Паліцыянты запісалі паказанні прысутных (у тым ліку старонняга сведкі, які іх выклікаў), нікога не затрымалі і паабяцалі, што будуць «разбірацца».

Пакуль Валя распавядала мне гэта, Google паведаміў мне, што ў гэты момант Гаварухін здымае ў Таліне фільм «Канец выдатнай эпохі», у якім адну з галоўных роляў іграе Дабранраваў. На фатаграфіі з сайта пра фільм Валя пазнала яшчэ аднаго з тых, хто нападаў - справа ў карычневай куртцы з капюшонам.

Валя скончыла сваё апавяданне словамі: «Нам пашанцавала, што мы сустрэлі культурных людзей...» - адзначыў Павел Гінтаў.