Deutsche Bank перавёў уклады з Расеі ў Польшчу

Немцы скарацілі дзель Расеі ў сваім партфелі амаль на траціну.

Пасля распродажу расійскіх папер сродкі былі пераразмеркаваныя ў першую чаргу на карысць Польшчы.

Адзін з фондаў Deutsche Bank скараціў дзель Расеі ў сваім партфелі амаль на траціну, палічыўшы, што нават нестабільная эканоміка Турцыі цяпер мае большую цікавасць для інвестараў, паведаміў РБК.

Мацней за ўсё фонд расчараваўся ў расейскім нафтагазавым і банкаўскім сектарах.

Фонд DWS Central Europe, Russia and Turkey, які належыць Deutsche Bank, у першым паўгоддзі 2014 фінансавага года, які скончыўся 30 красавіка, знізіў дзель расейскіх акцый у сваім партфелі больш чым на 30%, да 49,5%.

Скараціць дзель фонд прымусілі падзеі, якія адбыліся за апошнія паўгода (макраэканамічныя паказчыкі, санкцыі, уведзеныя супраць Расеі, і пагрозы іх пашырэння, а таксама «размытыя» перспектывы расейскага фондавага рынку), паведамляецца ў справаздачы фонду. «Пасля ўварвання Расеі на Крымскі паўвостраў расейскі фондавы рынак, калі меркаваць з індэксу ММВБ, асеў на 23%, а рубель за справаздачны перыяд абясцэніўся на 10%», - адзначыў мэнэджмэнт фонду ў сваім лісце акцыянерам. Непрыемным сюрпрызам сталі і тэмпы эканамічнага росту. «Расея можа сутыкнуцца з рэальным рызыкай тэхнічнай рэцэсіі, у той час як глабальная эканоміка прадаўжае паскараць свой рост», - адзначана ў справаздачах.

За першае паўгоддзе (з 1 лістапад 2013 года да 30 красавіка 2014 года) чыстыя актывы фонду патаннелі на 16,53%, што звязана з стратамі на расейскім рынку.

Сродкі DWS пасля распродажу расейскіх папер былі пераразмеркаваныя ў першую чаргу на карысць Польшчы, дзель якой у партфелі вырасла з 11,4 да 20,5%. Больш прывабным, чым расейскі рынак, мэнэджары фонду палічылі і рынак акцый Грэцыі, які, з іх назіранняў, аднаўляецца. Нават Турцыя, нягледзячы на напружаную палітычную сітуацыю і чаканні зніжэння тэмпаў росту ВУП у 2014, выглядае больш прывабна, чым Расея.

«Нельга сказаць, што Турцыя і Польшча выглядаюць значна мацнейшымі з пункту гледжання макраэканомікі, але з пункту гледжання палітычных рызык яны адназначна больш прывабныя», - адзначыў галоўны эканаміст фінансавай групы БКС Уладзімір Ціхаміраў. Для заходняга фонду пагроза санкцый выходзіць на першы план, таму такі ход выглядае лагічным, дадаў ён.

Прыкметней за ўсё за справаздачны перыяд фонд скараціў інвестыцыі ў нафтагазавы сектар, які ў кастрычніку мінулага года складаў 32,6% партфеля, у красавіку 2014 - ужо 25,4%. У прыватнасці, DWS паменшыў пазіцыі ў Газпроме, прадаў амаль палову сваіх акцый «Татнафты», скараціўшы ўкладанні ў 2,5 разы. DWS таксама скараціла ўкладанні ў расейскі банкаўскі сектар, пазбавіўшыся ад акцый ТКС-банка і ВТБ і амаль удвая паменшыўшы дзель у Сбербанку. На 31 кастрычніка інвестыцыі фонду (паводле кошту) у расейскія паперы складалі 308 млн даляраў, на 30 красавіка - ужо 152 млн. «Сказаць, што кампаніі гэтых сэгментаў непрывабныя, нельга, гэта найбольш ліквідныя паперы на расейскім рынку, цікавыя і ў плане дывідэндаў , і ў плане росту. Але ў той жа час нафтагазавы і банкаўскі сектары знаходзяцца пад большай пагрозай з пункту гледжання санкцый, таму ўсё зноў зводзіцца да палітычных рызык», - растлумачыў Уладзімір Ціхаміраў.

У канцы траўня кіраўнік фондаў рынкаў BlackRock казаў, што яны прадалі ўсе ўкладанні ў расейскія аблігацыі - на сотні мільёнаў даляраў. У першым квартале гэтага года фонды Oppenheimer International Bond Fund (OIBF) і Oppenheimer Global Strategic Income Fund (OGSIF), якія ўваходзяць у групу Oppenheimer (адзін з найбуйнейшых замежных інвестараў у расейскія каштоўныя паперы), прадалі амаль 70% расейскіх каштоўных папер, якія належалі ім, скараціўшы ўкладанні на $700 млн.

Таксама ў першым квартале дзель Расеі скарацілі фонд Templeton Russia and East European Fund (Templeton Russia) пад кіраўніцтвам Марка Мобіуса - да 46% ад чыстых актываў фонду з 61% у канцы 2013 года. Пры гэтым фонд павялічыў укладанні ў Румынію, Польшчу і Турцыю.