Следства: Ігар Пцічкін, які памёр у СІЗА № 1, ужываў наркотыкі

Так проста ў СК патлумачылі гібель у СІЗА зняволенага.

Следствам паводле справы аб смерці ў СІЗА № 1 арыштаванага Ігара Пцічкіна атрыманыя доказы сістэматычнага ўжывання ім курыльных сумесяў, якія змяшчаюць наркатычныя і псіхатропныя рэчывы, у 2011-2013 гадах.

Адзін з раённых аддзелаў Следчага камітэта Менска расследуе крымінальную справу аб псіхатропных рэчывах, паводле якой Пцічкін апазнаны як збытчык, паведаміла БелаПАН афіцыйны прадстаўнік СК Беларусі Юлія Ганчарова.

З яе слоў, цягам доўгага часу Пцічкін таксама сістэматычна ўжываў алкаголь. Пра гэта сведчаць матэрыялы справы і звесткі базы дадзеных аб правапарушэннях, згодна з якімі ён пяць разоў кіраваў транспартным сродкам у стане алкагольнага ап'янення.

Устаноўлена, што праз некалькі дзён знаходжання ў следчым ізалятары ў Пцічкіна сталі выяўляцца і нарастаць прыкметы вострага псіхічнага расстройства, выяўленыя ў галюцынацыі, трызненне, адмова ад ежы і пітва, маніі пераследу. З гэтай прычыны Пцічкін быў шпіталізаваны ў мэдычную частку ізалятара, дзе праз некаторы час памёр.

З матэрыялаў крымінальнай справы фактаў прымянення ў дачыненні да Пцічкіна гвалту, фізічнай сілы і спецсродкаў як супрацоўнікамі ізалятара, так і іншымі асобамі ў перыяд знаходжання яго ў СІЗА № 1 не бачыцца, падкрэсліў афіцыйны прадстаўнік СК. Пры гэтым Ганчарова адзначыла, што доўжыцца расследаванне крымінальнай справы ў дачыненні да медыцынскага персаналу СІЗА аб неналежным выкананні прафесійных абавязкаў, якія прывялі праз неасцярожнасць да смерці Пцічкіна.

Прызначаныя комплексная камісійная, паўторная судова-медыцынская, судова-псіхіятрычная экспертызы і судова-медычная экспертыза правільнасці выканання прафесійных абавязкаў медыцынскімі работнікамі. Вынікі гэтай экспертызы ўсталююць прычыны ўзнікнення у Пцічкіна псіхічнага засмучэння і яго смерці. Будзе вызначана, ці правільна аказвалася медыцынская дапамога медперсаналам следчага ізалятара.

Нагадаем, 15 траўня 2013 года суд Заводскага раёна сталіцы прысудзіў 21-гадовага менчука Ігара Пцічкіна да трох месяцаў адміністрацыйнага арышту за здзяйсненне злачынства, прадугледжанага арт. 417 КК (невыкананне прысуду суда аб пазбаўленні права займаць пэўныя пасады або займацца пэўнай дзейнасцю), за кіраванне транспартным сродкам у перыяд пазбаўлення права кіравання. 30 ліпеня малады чалавек разам з маці і сястрой прыбыў у Заводскае РУУС сталіцы, адкуль яго адправілі для адбыцця пакарання ў СІЗА № 1. Праз некалькі дзён супрацоўнікі ізалятара паведамілі сваякам, што Пцічкін сканаў.

Паводле папярэдняй версіі, смерць наступіла ад сардэчнага прыступу. Версія супрацоўнікаў ізалятара пра смерць зняволенага не пераканала ягоных сваякоў, і тыя накіраваліся на прыём да начальніка СІЗА № 1.

Размова з кіраўніцтвам ізалятара і начальнікам санчасці была запісаная на відэа. На відэазапісу сваякі загінулага не хаваюць сваіх здагадак, што да смерці Ігара датычныя супрацоўнікі СІЗА, аднак начальнік ізалятара гэта адмаўляе, заяўляючы, што ва ўстанове «нікога не б'юць». Ён мяркуе, што смерць маладога чалавека магла быць звязаная з ужываннем алкаголю або наркатычных рэчываў.

Начальнік санчасткі паведаміў, што незадоўга да смерці зняволены стаў праяўляць прыкметы неадэкватных паводзін. Яго прыйшлося перамясціць у медыцынскае аддзяленне ізалятара і зафіксаваць на ложку рамянямі, паколькі ён спрабаваў вырвацца.

У канцы верасня УСК Менску ўзбудзіла справу паводле ч. 2 арт. 162 КК у дачыненні да работніка медчасткі СІЗА, падазраванага ў неналежным выкананні прафесійных абавязкаў, якое пацягнула праз неасцярожнасць смерць Пцічкіна. Маці памерлага, прызнаная пацярпелай у гэтай справе, была азнаёмленая з высновамі спецыялістаў паводле шэрагу завершаных экспертыз у пачатку кастрычніка. У снежні 2013 крымінальная справа была прынятая да разгляду галоўным следчым ўпраўленнем СК Беларусі.

Архіўнае фота svaboda.org